Calēren
|
C'l artìcul chè 'l è scrit in
Arzân |
Calēren (Calerno in italiân) l'é 'na frasiòun dal cmûn ed Sânt'Ilâri, in pruvîncia ed Rèz, l'é a cîrca 3 chilômeter dal cèinter dal Cmûn e cîrca 13 chilômeter dal cèinter ed Rèz.
L' urégin ed la parola "Calēren" an n'é mia sicûra; a pré tratêres d' un nòm 'd urégin tedèsca (Ha Lern) che, in léngva longobêrda a vré dîr "trèin fât ed tèra crēta". Un pôst cun un nòm quêşi cumpâgn (Calernet) a 's câta in Provèinsa (Frância) , Êlpi Marétimi, atâch al Plateau de Calern.
Un pô de stôria
Calēren al vîn numinê per la préma vôlta in un documèint dal mél, cun riferimèint a la só Cumènda (a 's trâta 'd un bèin ed la Cēşa dê in fidócia a un religiōş bâsta che 'ch t' gnés a drē), préma benedetèina (dipendèint da la comunitê benedetèina ed Bersèl pó dêda a l' Ôrdin Ospedaliêr ed Sân Zvân ed Geruşalèm, oséia a i religōş che dôp a dvèinten famōş cme Cavalēr ed Malta.
A mēno 'd ûn chilômeter da la Cumènda, insém a la Via Emélia e atâch a la cēşa dedichêda a Sânta Margaréta, a gh'é al cèinter ed Calēren ch' al vîn ciamê, da la gînt dal pôst, "La Duchèsa",
La Cumènda l'ēra apûnt un xenodochio, oséia un stâbil gestî da di religiōş cme albêregh e uspdêl per i viaşadōr e pelgrèin, a sèmbra ch' al fós atâch a un pûnt céch insém a còl che, alōra, l'ēra ûn di tânt râm, (còl pió vêrs matèina e sèinsa rîvi), ch' a 's dividîva l' Èinsa, e che incō, ânca s' l' é sparî, al rapreşèinta al cunfîn tra Rèz e Sant'Ilâri, (l'Èinsa 'd incō, ch' a 's câta a sîra ed Sant'Ilâri, al fà da cunfîn tra la pruvîncia ed Pèrma e còla ed Rèz. Ânch int al cèinter ed Calēren, d'incō, a gh'ēra un stâbil ed l'istès gèner ed la Cumènda, adès a 'gh n'é armêş sōl 'na pêrt ciâme, da quî dal pôst, "Maşòun".
Fîn a mēno ed dû sècol fa Calēren, ânca se politicamèint l'ēra sòta al Duchêt ed Mòdna, al fêva pêrt ed la diôceşa es Pèrma, dâto che al cunfîn t'r al dō diôceşi l'ēra apûnt al râm pió a matèina ed l' Èinsa.
Incō Calēren, in pió che agrécol, l'é un impurtânt cèinter industriêl ch' l' à ciamê dimòndi gînta d'ed fōra sia italiân che furastēr.
Al gh'à 'na bòuna véta culturêla, ch' la fà rifèrimèint a j sō ûş e al sō abitódini antîghi, a gh'é un gróp specialişê in arcurdânsi stôrichi medioevêli, e 'na cumpagía ch' la rècita in dialèt. La Cēşa ed Calēren l'é dedichêda a la prutetrîş dal paèiş Sânta Margaréta (d' ed ché al scutmâj ed "margaritèin" dê a quî ed Calēren), mèinter l'utarôri ed la Cumènda l'é dedichêda a Sân Lurèins.
Spôrt
Zōgh dal balòun
La Virtus Calerno (cun presidèint Roberto Mazzali) la gh'à trèi squêdri:
- La squêdra in têrsa categorèia
- La qsuêdra di pasiunê
- La squêdra sota a i 21 ân.
Palavōlo
La Volley Calerno la gh'à al squêdri:
int setōr dòni:
- U13
- U16
- U21
- 1a Divişiòun
- Sèria D
int al setōr òm:
- U18
- 2a Divişiòun
- Sèria C
Int al campionêt U21, ed la la stagiòun 2006/2007, al ragâsi dal: Volley Calerno a gh' l' àn cavêda a impònres, a livèl regionêl, e rivêr secòndi, dôp avèir vînt al campiunêt pruvincêl.
Mutōr
A Calēren a gh'è la centrēla dal Motoclub Tricolore.
Nôta: cla pâgina ché l'é stêda inviêda cun 'na tradusiòun da Calerno trâta da it.wikipedia.org.
Guêrda la stôria ed la pâgina uriginêla per cgnòser l'elèinch 'd j autōr.