Caś Bobbitt

 Miranduléś

C'l artìcul chè 'l è scrit in Miranduléś

Prim piàṅ ad John Bobbitt

Al Caś Bobbitt 'l è stâ 'n fat ad crònaca dal 1993, finî in si giurnài ad tut al mónd, ch'al gh'à abû cuma prutagunìsta John Wayne Bobbitt (Buffalo, New York, 23 ad Mars dal 1967) e sò mujér, la Lorena Leonor Gallo (Bucay, Ecuadōr, 31 'd Utóbar dal 1970), na còpia americàna dvintàda famóśa parchè lì lē l'iva tajâ via 'l cas a sò marè c'n un curtèl da cuśìna.

I fat

La sira dal 23 ad Śugn dal 1993 la sgnōra Bobbitt l'à cavâ via 'l cas a sò marè mént'r al durmìva in dla sò cà ad Manassas, in Virgìgna. Dòp avér tòlt la màchina la dóna l'à pò butâ 'l uśèl ad John fóra da 'l finastrèṅ. La pulisìa la s è misa a pascàr-al dapartùt e quànd la 'l à catâ i cirùśìg i èṅ stâ bòṅ ad cuśìr-'g-'l incóra.

Subìt la dóna l'iva cuntâ a la pulisìa ch'la 'l iva fat parchè sò marè al “vgniva” sénsa spétar ch'anca lē la rivìs a 'l gudiōl e ch'al pinsàva sōl par lò. In séguit l'à tirâ fóra la stòria che lò al la picìs e ch'al turnìs sèmp'r a cà tard a la nòt e anc imbariàg. La dóna l'è finìda a prucès par leśiòṅ vuluntàri ma l'è stada asòlta in dal Setémbar dal 1993 parchè a gh'éra vgnû sōl un cōlp ad tèsta, na rabìda dgém acsè.

Par dasfrutàr al fat ch'l éra in cal méntar dvintâ famóś e ch'la gint la fus curióśa ad véd'r-ag la sò bèga tacàda 'd nóṿ, John Wayne 'l à girâ 'n film pòran ciamâ „John Wayne Bobbitt: Uncut“. A s trata 'd un tìtul a dópi sèns parchè in ingléś “uncut” a vōl dir “minga tajâ” ma anc “minga circuncìś” o “minga cinsurâ” quànd a s dascór ad pelìculi.

Al caś Bobbitt e 'l taj dal cas ad òpra ad mujér incasàdi 'l à fat scōla parchè in séguit i èṅ sucès incóra di fat cumpàgn in gir p'r al mónd .

Nòti