C'l artìcul chè 'l è scrit in Arzân Emiliàn

Provincia di Reggio Emilia-Stemma.png Artécol in dialèt arzân Reggio Emilia-Stemma.png

Cà di Frê (Ca' de' Frati in italiân, Domus Fratrum in latèin) l'é 'na frasiòun ed campâgna dal cmûn ed , a 4 chilômeter dal cèinter dal paèiş e a 26 chilômeter dal cèinter ed Rèz. Al cunfîna cun i cmûn ed Fâbrich, Campagnōla e la sitê ed Chêrp.

Geograféia

Al teritôri, ed vèina sōl agrécola, l'é sèinsa un vèira cèinter abitê mó l'é fât da cà sparpagnêdi, dimòndi ed còsti în cà da cuntadèin, adèsa, bandunêdi. Insém a sté teritôri a gh' é un móc ed canêl ed bunéfica e cōrs d' âcva gestî da la Bunéfica Parmigiana Moglia, ch' la fà pêrt dal Consorzio di Bonifica dell'Emilia centrale [1].

Socetê

Andamèint dal nòmer ed j abitânt

Da la secònda metê dal Novsèint la frasiòiun l'à vést un şvudêres ed faméj ch' àn smés ed fêr i cuntadèin e che a 's în spustêdi ind i paèiş aşvèin. La popolasiòun l'é csé pasêda da i 675 abitânt dal 1962[1], a i 319 dal 1983[2]fîn a i 185 dal 2010[3].

Monumèint e pôst interesânt

La cēşa

La parôchia ed Cà di Frê, dóve la cēşa l'é dedichêda a Sânt' Antòni da Pâdva, l'é stêda fundêda al 14 avrîl dal 1948, divîsa da Ré. Da sèimper l'é dal civariê ed Curèz, la fà pêrt ed la zôna pastorêla ed la Cēşa ed Ré, in dó l'é lighêda in un ónica unitê pastorêla. Da la só fundasiòun la gh'à al tétol ed priorê.

Zôni naturêli

Insém al cunfîn cun al cmûn ed Chêrp a ghì'é al Casse di espansione del Cavo Tresinaro [2], 'na grôsa ôpra idravlîca fâta per limitêr al pîni apûnt dal Chêv Treşnêr, ch' l' é dvinteda 'n' impurtânta zôna naturêla a bêda dal diversitê naturêli. La zôna la gh'à un cèinter vîşiti [3] e un percôrs in mèz al piânti e al bèsti, l'é lêregh quêşi 1 miliòun ed mēter quêder.

Cultûra

Istrusiòun

Int j ân 1960, cm' a dîşen j Anvâri ed la diocêşa, a gh'ēra in funsiòun 'na scōla elementêra pó sarêda perché an gh'ēra mia asê sculêr. I studèint ed la frasiòun, p'r al scōli ed l' ôbligh, a gh' àn d' andêr int al scōli dal cèinter comunêl.

Servési póblich e traspôrt

La strêda pruvincêla 46, ch' l' unés Ré a Rōl, l'é la strêda principêla ch' la travêrsa la frasiòiun. An gh'é mia léni ed trâm o corêri p'r al traspôrt dal pôst.

Spôrt

Int al pôst, atâch a la cēşa parochiela, a gh'é un Cèinter per la pèsca spurtîva cun soquânt laghèt artificêl.

Nôti

  1. AA.VV., Annuario della Diocesi di Reggio Emilia 1963, Editrice AGE, Reggio Emilia 1963
  2. AA.VV., Le diocesi di Reggio Emilia e Guastalla 1984, Compendio di notizie e dati statistici, Editrice AGE, Reggio Emilia 1984
  3. Sît dal Diôceşi ed la Cēşa Catôlica

Nôta: cla pâgina ché l'é stêda inviêda cun 'na tradusiòun da Ca' de' Frati trâta da it.wikipedia.org.
Guêrda la stôria ed la pâgina uriginêla per cgnòser l'elèinch 'd j autōr.