Anna, quel particolare piacere
|
C'l artìcul chè 'l è scrit in
Miranduléś |
 Anna, quel particolare piacere
| ||
 Pani e l'Edwige Fenech in na figùra dal film | ||
| Anna, cal piaśēr particulàr là 1973 | ||
|---|---|---|
| Regìa: Giuliano Carnimeo | ||
| Scritōr: Luciano Martino • Sauro Scavolini Francesco Milizia • Ernesto Gastaldi | ||
| Atōr: Edwige Fenech • Corrado Pani • Carla Calò Richard Conte • John Richardson • Ettore Manni Laura Bonaparte • Corrado Gaipa • John Bartha | ||
| Müsica: Luciano Michelini | ||
| Léngua: Itagliàṅ • Francéś | ||
| Dürä dal film: 100 minüt | ||
| Nasiōṅ: Itàglia | ||
Anna, quel particolare piacere (Anna, cal piaśēr particulàr là) 'l è 'n film pulisiésc e dramàtic dal 1973 ad Giuliano Carnimeo. 'L è stâ girâ a Róma, e Milàṅ e a Bérgam.
Sunt
L’Anna (Edwige Fenech) la fà la caséra in un bar a Bérgam. Na sira la cgnós Guido Salvi (Corrado Pani), espunènt dal narcutràfic ch'al lavóra p'r al boss Riccardo Soriani (Richard Conte), e la s inamóra 'd lò anc s'l è 'n delinquènt e s'al la pìcia s'la n fà minga a mōd. La 'l diś ciàr e tónd anc a na sò amìga ch'l'è andàda a star a Róma, la Loredana (Laura Bonaparte), méntar sò màdar (Carla Calò) la n è minga 'd acòrd.
Riccardo al gh'à da far rivàr un càr'g ad dròga in Śvisra e Guido, in cambi 'd un 10%, al strulga 'n piàṅ par lugàr-la in dal fónd 'd un car da mòrt. Quànd a pâr ch'a sia a pòst incòsa al boss al vîṅ a savēr ch'la pulisìa 'd fruntéra la sà incòsa dònca al taca a pinsàr ch'al sò sòci al s sia mis 'd acòrd c'n al sò nemìg Zuco (Ettore Manni), un mafióś sicigliàṅ. Par cal mutìṿ chè 'l al fà impinìr ad bòti, pò quànd Guido al gh diś che lò a n gh'èntra gnint, al gh śibìs ad far purtàr la dròga da 'd là da 'l cunfìṅ par l’Anna in parsòna. A spétar-al là par fargàr-'g incòsa a gh'è 'n óm ad Zuco, 'l “Albèṅ” (Bruno Corazzari), ma Guido 'l al fà fóra sparànd-ag quàtar cōlp méntar l’Anna l'è sèg. P'r a n avér briśa di testimòni cóntar, Riccardo al gh diś ad cupàr la sò dóna o sinò ad tiràr-la dènt'r in dal gir e par far-al al vōl ch'la faga la putàna p'r un sò amìg, un vèć śbavóś ad nóm Frossi (Ennio Balbo), tant la farév incòsa par Guido. Quànd però chi lò al gh al diś, lē la vèra la bóca par dir-ag ch'al gh fà schiva. 'L óm al la mét in riga mulànd-'g un marùc in dal grugn e l’Anna la và a far qvél ch'la gh'à da far.
In séguit chi lē la capìs 'd èsar drē a spétar un putèṅ. Quànd Guido al gh admànda ad chi 'l è 'l fiōl e lē la gh rispónd «mio, sōl mio», lò al gh órdna 'd aburtìr. Al dutōr ciamâ da lò (Corrado Gaipa) al gh diś ch'l'è tròp avànti, a gh'è da far un rasćiamènt. Par furtùna dl’Anna a riva la pulisìa giùst in tèmp par purtàr-'l in parśòṅ. La sò amìga Lisa (Shirley Corrigan) la gh ślunga di bèsi acsè la pōl andàr a star da la Loredana e là la parturìs un masć mént'r in Śvisra Soriani al fà saltàr p'r ària Zuco.
In séguit l’Anna la s mét insém a Lorenzo (John Richardson), un dutōr ch'al l'à jutàda a salvàr sò fiōl a 'l uśdàł. Ma i an i pàs'n e Guido adès 'l è lìbar e incasâ négar sèg.