Alibi.com
|
C'l artìcul chè 'l è scrit in
Miranduléś |
 Alibi.com
| ||
 Arruti e Boudali in na figùra dal film | ||
| id. 2017 | ||
|---|---|---|
| Regìa: Philippe Lacheau | ||
| Scritōr: Philippe Lacheau Julien Arruti • Pierre Dudan | ||
| Atōr: Philippe Lacheau • Élodie Fontan Julien Arruti • Tarek Boudali • Didier Bourdon Nathalie Baye • Nawell Madani • Medi Sadoun | ||
| Müsica: Maxime Desprez • Michaël Tordjman | ||
| Léngua: Francés | ||
| Dürä dal film: 90 minüt | ||
| Nasiōṅ: Frància | ||
Alibi.com (id.) 'l è na cumèdia francéśa dal 2017 ad Philippe Lacheau. L'è stada bòna 'd far sù dagnóra vint-sinc migliòṅ 'd euro, dòp ès'r-an custàda sèt e mèś, muciànd sù un migliòṅ e sènt-mila spetadōr in Frància.
Frai i cliènt ch'i vrévan druàr i servìsi dl'agensìa „Alibi.com“ a s lasa inténdar ch'a gh sia anc al presidènt francéś François Hollande ch'al và da la sò amànta, la Julie Gayet, in muturèṅ.
Sunt
Grégory Van Huffel (Philippe Lacheau), fan sfegatâ 'd Jean-Claude Van Damme, 'l è 'n śōvan ch'al gh'à n'agensìa ciamàda Alibi.com specialiśàda in dal strulgàr di àlibi par la gint ch'la gh'à dal ròbi da tgnir nascòsti cuma còran a 'l mujēr, quaciadùri par fnòć o di mutìṿ p'r a n èsar-'g minga in evènt nujóś. Fra i sò culaburadōr a gh'è 'l vìrgin Augustin (Julien Arruti) e Mehdi (Tarek Boudali), un magrabèṅ cun di atàc ad narculesìa ch'al s è śuntâ da pôc.
Un dè Grégory al cgnós par caś na ragàsa ch'l'éra andàda a far na cursa in di bòsc, la Flo Martin (Élodie Fontan), e 'l s fà amìg sèg par pò dvintàr anc al sò muróś. Chi lē, laureàda in léǵ, l'è una ch'la n s cumpatìs pròpria briśa i delinquènt e i balìsta patintâ. P'r a n dascórar minga dal sò lavōr, al ragàs al gh diś ch'al fà 'l steward.
Quànd lē la 'l pòrta a séna da i suo par far-'g-al cgnósar, Grégory al s rénd cònt che sò pàdar, Gérard (Didier Bourdon), 'l è òṅ di sò cliènt ch'al gh'iva péna dmandâ na quaciadùra p'r andàr a Cannes cla stmana lè cun la sò amànta, la cantànta Cynthia Bellini (Nawell Madani), invéci 'd armàgn'r a cà sun sò mujēr (Nathalie Baye) par festegiàr 'l aniversàri 'd matrimòni.