Veronica Guerin
|
C'l artìcul chè 'l è scrit in
Miranduléś |
La Veronica Guerin (Dublîṅ, 5 ad Luj dal 1958 – Dublîṅ, 26 ad Śugn dal 1996) l'è stàda na giurnalìsta irlandéśa mòrta masàda p'r avér denunsiâ di traficànt ad dròga.
In dal 2003 al regìsta Joel Schumacher 'l à fat un film biugràfic su 'd lē cun prutagunìsta la Cate Blanchett, Veronica Guerin - Il prezzo del coraggio.
Biugrafìa
La Veronica Guerin, cgnusùda anc c'n al scutmàj ad “Ronnie”, da śōvna la stùdia in na scōla catòlica dla sò sità, Dublîṅ, faghénd dimóndi spòrt. Dòp la làurea la lavóra par tri an in dla dita 'd sò pàdar par pò métar sù na sucietà 'd pùblichi relasiòṅ. In séguit la s davśìna a 'l partî pulìtic irlandéś dal Fianna Fáil laurànd-ag cuma segretària e cuma teśurēra.
In dal 1990 la dvènta giurnalìsta p'r al Sunday Business Post, p'r al Sunday Tribune e p'r al Sunday Independent. 'L è cun cal giurnàł chè ch'la taca a denunsiàr i tràfic ad dròga in dal marcâ dla capitàł irlandéśa e la ricév acsè dal minàsi 'd mòrt. In dal Śnar dal 1995 'n óm cun na pistòla al và a catàr-la a cà sua parchè al vliva tiràr-ag dū cōlp a 'l gambi par dar-ag na lesiòṅ. La Veronica però la và avànti listés e cun curàǵ la dmanda a 'l criminàł John Gilligan cum è-la ch'l è pîṅ ad bèsi anc s'al n gh'à gnanc un lavōr. 'L óm al gh i dà pò 'l gh prumét ad purtàr-ag via sò fiōl Cathal e 'd far-la fóra s'la s parmét incóra 'd scrìvar quèl su 'l sò cònt.
Al 26 ad Śugn dal 1996, méntar l'éra férma a 'n semàfur cun la sò màchina, dū óm in mòta i la cópan sparànd-ag. Gl'indàśin su la sò mòrt i purtaràṅ a catàr i respunsàbii in na gang ad spaciadōr e a 'l arèst ad sènt-sinquànta parsòni e pasa.
Àtar prugèt
Wikimedia Commons contiene file multimediali su Veronica Guerin
