Urban Legend

C'l artìcul chè 'l è scrit in Miranduléś Emiliàn

Video-x-generic.svg Urban Legend
Urban Legend.png
Rosenbaum e la Tara Reid in na figùra dal film
Legénda urbàna
1998
Regìa: Jamie Blanks
Scritōr: Silvio Horta
Atōr: Jared LetoJohn NevilleLoretta Devine
Rebecca GayheartJoshua JacksonAlicia Witt
Julian RichingsBrad DourifRobert Englund
Michael RosenbaumTara ReidDanielle Harris
Müsica: Christopher Young
Léngua: Ingléś
Dürä dal film: 99 minüt
Nasiōṅ: Stat UnîCànada


«
'L è sucès a qualchidòṅ ch'al sà, qualchidòṅ ch'at cgnós. Tè 't sē 'l pròsim!»
(Tagline dal film)


Urban Legend (Legénda urbàna) 'l è 'n film ad scarésa americàṅ e canadéś dal 1998 ad Jamie Blanks.

La pelìcula, ch'l'à muciâ sù stanta-dū migliòṅ ad dòlar a 'l incìrca a frònt 'd un cóst ad quatórdas, la gh'à abû dū séguit: Urban Legend - Final Cut dal 2000 e Urban Legend 3 dal 2005.

Sunt

In na nòt ad piōva, la śōvna Michelle Mancini (Natasha Gregson Wagner) la s férma a na stasiòṅ 'd benśìna parchè la rìsćia 'd armàgn'r a pē. Al benśinàr (Brad Dourif) prima al próa a tartajàr-ag quèl, pò al la sèra dènt'r al sò ufìsi. Cardénd che 'l óm al gh vója far dal mâł, la ragàsa la scapa via in présia da 'd lè ma pò, quànd l'è in màchina, a salta fóra 'n tisi misterióś c'n un giubòt 'd eschiméś adòs ch'al la masa cun na manàra. A cal masamènt lè a taca a lauràr-'g al studènt ad giurnalìśum Paul Gardener (Jared Leto), iscrìt in un culéǵ dal New England, al Pendleton College.

La sira dòp al manìag al bèca dū muruśèṅ, la Natalie Simon (Alicia Witt) e Damon Brooks (Joshua Jackson), ch'i s èṅ lugâ in dal bòsc p'r armàgnar da par lōr. Al ragàs al finìs impicâ méntar la śōvna la scapa via par ciamàr in ajùt la guàrdia dal càmpus, la Reese Wilson (Loretta Devine). Quànd la tórna indrē però al còrp ad Damon al s cata piò e la Natalie la taca a pinsàr ch'al sia tut un schèrs. Di sò amìg e cumpàgn 'd università, la Brenda Bates (Rebecca Gayheart), Parker Riley (Michael Rosenbaum) e la Sasha Thomas (Tara Reid) i crédan ch'al sia partî p'r un fiṅ 'd stmana in muntàgna. In cal méntar la sò amìga Tosh Guaneri (Danielle Harris) la vîṅ cupàda in cambra.

A la Natalie a gh vîṅ in a mènt un fat sucès vint-sinc an prima in dal culéǵ, un masèl ad studènt ch'a s pinsàva èsar la legénda metrupulitàna. 'L ùnic scampâ in alóra dal grup adès 'l è dvintâ insgnànt in dla scóla, al prufesōr William Wexler (Robert Englund).

Culegamènt estéran