Tutti gli uomini del re (film 2006)

C'l artìcul chè 'l è scrit in Miranduléś Emiliàn

All the King's Men
Tutti gli uomini del re

Jude Law in na figùra dal film
Tut i óm dal rè
2006
Regìa: Steven Zaillian
Scritōr: Steven Zaillian • Robert Penn Warren
Atōr: Sean PennJude LawAnthony Hopkins
Kate WinsletMark RuffaloPatricia Clarkson
James GandolfiniKathy BakerFrederic Forrest
Müsica: James Horner
Léngua: Ingléś
Dürä dal film: 128 minüt
Nasiōṅ: Stat UnîGermàgna


«
A gh'è dla gint ch'la farév incòsa par guadagnàr putēr. Di àt'r i farévan da tut par tgnir-'s-al stric.»
(Tagline dal film)


Tutti gli uomini del re (Tut i óm dal rè) 'l è 'n film biugràfic americàṅ e tedésc dal 2006 ad Steven Zaillian trat da 'l rumànś umònim ad Robert Penn Warren, Prèmi Pulitzer dal 1946, e arfacimènt dna pelìcula c'n al stés nóm dal 1949, vinsidōra dal Prèmi Òscar. Al tōś ispirasiòṅ da la vita dal guvernadōr dla Luiśiàna Huey Pierce Long, pupulìsta 'd sinìstra mòrt masâ a Baton Rouge in dal 1935.

Custâ sinquànta-sinc migliòṅ ad dòlar, al film al 'n à fat pò sù sōl nóṿ e mèś, riśultànd ès'r al flòp più impurtànt dal perìud 2005/2010 par la rivìsta Forbes[1].

Al prutagunìsta Sean Penn, ch'in dal film al fà 'n vilàṅ dal sud druànd 'n asènt dixie pēś[2], in Itàglia 'l è ardupiâ par Massimo Rossi ch'al dróa invéci 'n asènt dla Basitàglia[3].

Sunt

In dla Luiśiàna di an Quarànta, Willie Stark (Sean Penn) al scampa faghénd al vendidōr a dumisìli ma 'l è anc teśurēr dal partî demucràtic. Al pòrta-bórsi dal guvernadōr in carga, Tiny Duffy (James Gandolfini), al gh admànda 'd candidàr-'s a gl'elesiòṅ par purtàr via di vōt a i republicàṅ ma Willie al decìd ad cùrar da indipendènt vinsénd la partìda a la granda faghénd di cumìsi pupulìsta prumiténd incòsa a tut e dand adòs a i putènt, a i banchēr e a petrulēr, parchè lò 'l è 'ṅ vilàṅ da la banda dal pòpul e 'l è cumpàgn a lōr.

Rivâ a 'l putēr al decìd ad tiràr dènt'r a 'l sò staff Duffy, al giurnalìsta Jack Burden (Jude Law) e la Sadie Burke (Patricia Clarkson) cuma strulgadōra pulìtica. In dal méntar ch'al taca a far stradi, pònt e scōli, spindénd un squantèr'n ad bèsi purtâ via a i pès grôs dal stat, Willie al dvènta arugànt e curót tant ch'al giùdas in pensiòṅ Irwin (Anthony Hopkins), un burghéś ch'l à praticamènt carsû Burden da pìcul, al s diś 'd acòrd su la denùnsia 'd impeachment purtàda avanti da i senadōr cunservadōr federài.

Al guvernadōr al próa in tut al manéri ad far-al taśēr, p'r insgnàr anc a i sò rivài che mét'r-as cónt'r ad lò a n cunvîṅ briśa, pò al dà inìsi a na relasiòṅ cun l’Anne Stanton (Kate Winslet), fiōla d'l èx guvernadōr mòrt dla Luiśiàna, dimóndi cunsiderâ da cal bandi lè. Inólt'r al decìd ad tiràr sù 'n uśdàł pùblic dimóndi grand cun 'l ajùt dal fradèl dla sò muróśa, Adam (Mark Ruffalo).

Culegamènt estéran

Nòti

  1. Al méj di flòp: cuśa ś diś-la la lista 'd Forbes su la realiśasiòṅ di film? The Guardian, 3 ad Favràr dal 2010
  2. All The King's Men The Independent, 26 'd Utóbar dal 2006
  3. Tut i óm dal rè Film TV 52/2006