Suspect - Presunto colpevole

C'l artìcul chè 'l è scrit in Miranduléś Emiliàn

Suspect
Suspect - Presunto colpevole

La Cher in na figùra dal film
Suspèt - Cardû culpévul
1987
Regìa: Peter Yates
Scritōr: Eric Roth
Atōr: CherDennis QuaidLiam Neeson
John MahoneyJoe MantegnaPhilip Bosco
Müsica: Michael Kamen
Léngua: Ingléś
Dürä dal film: 121 minüt
Nasiōṅ: Stat Unî


«
A tut i cóst... Faghénd frònt a 'l perìcul... I riv'ràṅ a la véra.»
(Tagline dal film)


Suspect - Presunto colpevole (Suspèt - Cardû culpévul) 'l è 'n thriller americàṅ dal 1987 ad Peter Yates scrit p'r Eric Roth.

Cal film chè 'l è stâ bòṅ ad far sù dagnóra daśnóṿ migliòṅ ad dòlar esénd-an custâ sédas.

Sunt

Durànt al fèsti 'd Nadâł, un giùdas dla Cōrt Supréma di Stat Unî, Lowell (Thomas Barbour), al s tōś la vita tirànd-as na sćiuptàda in bóca. Subìt dòp al cadàvar dn'archivìsta dal Dipartimènt ad Giustìsia, l’Elizabeth Quinn (Katie O'Hare), al salta fóra da 'l fiùm Potomac. La pulisìa la pènsa ch'a cupàr-la a sia stâ 'n barbòṅ ch'al viṿ da cal bandi lè, Carl Wayne Anderson (Liam Neeson), parchè i gh'aṅ catâ i ducumènt dla vitma. Al buletàri 'l è 'n èx suldâ dal Vietnam armàś uféś in guèra dvintànd sōrd e mut. Esénd sénsa bèsi, par lò a vîṅ numinàda n'avucàta 'd ufìsi, la Kathleen Riley (Cher).

A taca 'l prucès purtâ avànti da 'l prucuradōr dl'acùśa Charlie Stella (Joe Mantegna) ch'l è sicûr ch'al strasòṅ al sia culpévul anc parchè 'l è 'n tisi dimóndi viulènt e 'n testimòni al 'l à vdû durmìr dènt'r a la màchina dl’Elizabeth in un parchéǵ al dè ch'l'è mòrta. Fra i mémbar dla giurìa a gh'è Eddie Sanger (Dennis Quaid), un pòrta-bórsi ch'al gh śguàsa lè a Washington par far pasàr dal léǵ in favōr di prudutōr dal lat dal sud, stricànd 'l òć a i pulìtig cuma la senadōra Grace Comisky (E. Katherine Kerr) o 'l vice-prucuradōr generàł Paul Gray (Philip Bosco).

Eddie al taca na relasiòṅ cun la Kathleen e a jutàr-la in dgl'indàśìn, un quèl ch'a n s pōl pròpria minga far parchè cóntar la léǵ tant che s'al giùdas dal prucès, Matthew Bishop Helms (John Mahoney), 'l al vgnis a savēr, chi lē la risćiarév la radiasiòṅ da 'l ōrdan di avucàt p'r a n dir pèś.

A salta fóra che l’Elizabeth l'éra la segretària 'd Lowell e che, prima 'd tōr-as la vita, al giùdas al gh'iva dâ n'audio-caséta. Chi lē l'iva butâ 'l òć su 'l carti 'd un sò vèć prucès in du 'l óm, prima 'd èsar prumòs e far caréra, 'l iva giustâ 'l ròbi par far asòlv'r un culpévul.

Culegamènt estéran