C'l artìcul chè 'l è scrit in Miranduléś Emiliàn


«
Stay around, the sun goes down, babe I'm feeling right, take a chance with love romance, have some fun tonight. Everybody, summertime love, you'll remember me, everybody, summertime love, be my lover, be my baby, boys boys boys, I'm looking for a good time, boys boys boys, get ready for my love, boys boys boys, I'm looking for the good times, boys boys boys, I'm ready for your love. Boys and girls in the summertime love, summertime love on the beach tonight.»
(EN)(Boys, 1986)
«
A stag in gir, al sól al cala, teśôr a m sènt bèṅ, tó n'ucaśiòṅ cun na stòria 'd amór, divèrt-at stasìra. Tut, amór 'd istâ, a v arcurdarìṿ ad mè, tut, amór 'd istâ, al mè amant, al mè amór, ragàs ragàs ragàs, a sòṅ drē a pascàr da divertìr-um, ragàs ragàs ragàs, stav prònt p'r al mè amór, ragàs ragàs ragàs, a sòṅ drē a pascàr da divertìr-um, ragàs ragàs ragàs, a sòṅ prònta p'r al vòst'r amór. Baghét e baghéti in amór 'd istâ, amór 'd istâ in spiàgia stasìra.»
(MUD)
Sabrina Salerno


Sabrina Salerno l'è na cantànta, atōra e showgirl itagliàna nada a Genua al 15 ad Mars dal 1968.

Purtàda al sucès par Claudio Cecchetto, l'è dvintàda famóśa in di an Utànta dòp ch'l'à partecipâ a dal traśmisiòṅ televiśìvi quai W le donne e Premiatissima in dua a s vdiva ch'l'éra pròpria gnuda sù bèṅ, cun dal fórmi dimóndi sexy (e a n gh'éra minga al silicòṅ in alóra). Cuma cantànta l'à vindû da più ad vint migliòṅ ad disc in tut al mónd e l'à anc fat soquànt film.

Biugrafìa

Debùt

Dòp èsar carsùda da pìcula a Sanremo cun i nunòṅ e avér vins un tìtul ad belésa (Miss Liguria), l'à fat al sò debùt in televiśiòṅ in dal 1984 in dal prugràma ad Rete 4 W le donne cundót par Andrea Giordana e Amanda Lear. 'L an dòp l'à laurâ a Premiatissima in dal Canale 5 insém a Johnny Dorelli.

La vèṅ duciàda par Claudio Cecchetto ch'a gh fà far na cansòṅ Sexy girl in dal 1986, siggla dal Festivalbar ad c'l an lè. Al stil dal sìngul, ch'al vénd bèṅ in Itàglia e Austraglia, 'l è quél dance. In cal mèntar la cuntìnua a lauràr in televiśiòṅ faghénd Grand Hotel in dal 1986 e Sandra e Raimondo Show in dal 1987, sèmpar par Canale 5.

I an Utànta: al sucès internasiunàl

Fra 'l 1986 e 'l 1987 la fà gnir fóra al sò prim àlbum Sabrina ch'al gh'à dèntar al sìngul bèla publicâ Sexy Girl, dal cover (Lady Marmalade, Kiss ad Prince, My sharona e Da ya think I'm sexy ad Rod Stewart) e dal canti nóvi ad paca, cuma Hot girl e Boys (Summertime love). Quést chè specialmènt 'l è stâ al sìngul ch'al gh à vèrt tut i us in Europa. Al canti ad Sabrina i éran da spés cumpagnàdi da di viddeo dimóndi malisióś, cun lē cun adòs di giachét sgualsî e pìcui ch'a gh stricàvan al téti bèli pini e quand la balàva, al regipèt al fava sù e śò cun in mèś di crucifìs gigànt.

In Spaggna, tant par dir-'n una, l'à fat sù un caś nasiunàl quand, durànt na sò eśibisiòṅ 'd Hot girl, la gh'è gnuda fóra na téta p'r un pès. I éran i tèmp dla muvida e Sabrina l'è dvintàda subìt n'icóna sexy.

Sèmpar in chi an lè, l'à anc fat di film: Grandi magazzini (1986), Professione Vacanze (telefilm, 1987) e il thriller Le foto di Gioia ad Lamberto Bava (1987) in du la fà na mudèla e la vèṅ magnàda viva par di aśióli e dal vrèspi, murénd cun dla mèl in dal grugn e na facia pina ad bugni.

«
Hot girl hot girl, I'm satisfaction baby, hot girl hot girl, I'm dynamite, hot girl hot girl, I'm satisfaction, crazy hot girl hot girl, take me tonight. Boy - I'm looking for a good time, Love - whatever's on your mind, Play - my game no explanation, Feel - your body close to mine.»
(EN)(Hot girl, 1986)
«
Ragàsa bujénta ragàsa bujénta, a sòṅ la sudisfasiòṅ teśôr, ragàsa bujénta ragàsa bujénta, a sòṅ dla dinamìte, ragàsa bujénta ragàsa bujénta, tó-l-um stasìra. Ragàs - A sòṅ drē a pascàr da divertìr-um, Amór - quèl ch'a sia in dla tò tèsta, Śóga - al mè śóg a n gh à minga biśógn ad spiegasiòṅ, Sènt - al tò còrp davśèṅ al mio.»
(MUD)

In dal 1988 a véd la luś al secónd àlbum, Super Sabrina, cun dèntar soquànt sìngui ad sucès cuma My chico, All of me e Like a yo-yo ad Giorgio Moroder, siggla finàl dal prugràma dal Sàbat sira Odiens, spetàcul ad Canale 5 cun Lorella Cuccarini, Ezio Greggio, Gianfranco D'Angelo e Sabrina.

«
All of me, all of me wants all of you. I know that boys are all the same, they wanna be a Casanova, they think that love is just a game and not worth crying over. But I been thinking about you since you've been looking at me and I've got something to say.»
(EN)(All of me, 1988)
«
Mè a vój sól, mè a vój sól tut ad tè. Al sò ch'i ragàs i èṅ tut cumpàgn, i vólan èsar di Casanova, i pènsan ch'l'amór al sia sól un śóg e ch'a n val minga la péna ad piànśar. Ma a t ò pinsâ da quand ta m à piscâ e a gh'ò na ròba da dir-at.»
(MUD)

In dal 1989 l'incìd 'n àtar sìngul Gringo (ch'al s piàsa al dècim pòst in Itàglia) e la fà un cuncèrt in Russia a 'l Olimpisky Stadium ad Mosca in frònt a 50.000 parsòni, gnû fóra anc in VHS cun al tìtul ad Sabrina Live In Moscow.

Sempre in c'l an lè la gira 'n àtar film, na cumèdia ad Neri Parenti, Fratelli d'Italia, cun Christian De Sica, Massimo Boldi e Jerry Calà. Quést chè al scumét un milione ad franc ch'al gh la cavarà a purtàr-s-la a lèt anc s'l'è la mujér dal sò padròṅ, ma a n gh la cavarà minga.

In cal mèntar in Inghiltéra, in du l'è stada la prima cantànta itagliàna a piasàr al sò canti in di piaṅ alt dla clasìfica, i s invéntan che Sabrina e Samantha Fox, l'atra cantànta dal mumènt cun dal téti gròsi, i n s pòsan minga supurtàr l'una cun cl'atra.

I an Nuànta: mùśica, televiśiòṅ, teàtar e cinéma

Sabrina Salerno in Russia in dal 2010

I an Nuànta i s vèran cun na compilation 'd òt braṅ rimixâ cun dèntar anc al sìngul Gringo, Super Remix, publicàda par la Casablanca.

In dal stés an l'incìd al sìngul Yeah yeah purtànd-al anc al Festivalbar e pò l'è insém a Scialpi in dal cast dal prugràma ad Rai 2 Ricomincio da due cundót par Raffaella Carrà.

Sèmpar in dal 1990 a vèṅ fóra al tèrs àlbum ad Sabrina, Over the Pop, cun di pès ad Giorgio Moroder cum al sìngul Shadows of the night e Love is like magic.

Al 1991 'l è 'n an dimóndi impurtànt par Sabrina parchè la regìstra la sò prima canta in itagliàṅ, Siamo donne, purtàda a Sanremo insém a Jo Squillo. Par 'l ucaśiòṅ a vèṅ ristampâ Over the Pop e fat gnir fóra al sìngul Dirty boy look. Cun c'l àlbum chè Sabrina la taca anc a scrìvar al sò canti cuma Domination.

«
C'è chi dice che l'amore oggi non ha più valore perché solo ai soldi pensa e alla fine mangia in mensa, burattini incravatattati da 1.500.000 al mese, su e giù per la città sulla jeep a fare spese, attento che cadi, attento che cadi. Ma che vita vuoi, in che mondo sei, siamo donne, oltre le gambe c'è di più.»
(IT)(Siamo donne, 1991)
«
I dìśan che 'l amór incō al n val più gnint parchè a s pénsa sól a i bèsi e pò a s magna in ménsa, buratèṅ cun la cravàta da 1.500.000 ad franc al méś, sù e śò par la sità cun al gipòṅ a far dal còmpri, òcio ch'a n t casc, òcio ch'a n t casc. Ma che vita vō't?, in che mónd sē't?, a sém dal dóni, in śònta al gambi a gh'è d'l àtar.»
(MUD)

In Francia la fà gnir fóra al sìngul Cover Model propria mèntar la soubrette Angela Cavagna (in pasâ na sò curìsta e balerìna), la gh diś da drē ch'la gh'à i làbar e al téti arfàti ad nóṿ. Al caś 'l è pò finî in di tribunài parchè la Salerno la gh'à dmandâ un riśarcimènt.

In cal perìùd lè Sabrina la taca a vlér un cambiamènt, la n vōl piò figuràr sól p'r èsar n'artìsta sexy cum a gl'inìsi, e la vèṅ in cuntràst cun al sò manager ch'al vrév ch'la cantìs di braṅ scansunâ e malisióś e basta.

In Dicèmbar dal 1991 la fà part dal cast dla traśmisiòṅ ad Canale 5 Bellezze sulla neve e la canta la siggla Love Dream. In Favràr la 'rdòpia laurànd in Spaggna in dal prugràma Bellazas en la nieve par Telecinco.

In dal 1994 la s dastàca dal sò manager Gianpiero Menzione e la fà gnir fóra du sìngui dance: Rockawillie e Angel Boy. In séguit a vèṅ publicâ al sò prim disc in du la canta in itagliàṅ, Maschio dove sei, cun déś braṅ in culaburasiòṅ cun Massimo Riva e Vasco Rossi. 'L àlbum 'l è anc stâ pò ristampâ cun al tìtul Numeri cun al stési canti cun da piò Numeri.

In dal 1995 la fà al sò debùt a teàtar cun la cumèdia I cavalieri della tavola rotonda 'd Alessandro Capone in dla part ad Morgana insém a Tosca d'Aquino, Gianfranco D'Angelo e Daniele Luttazzi.

In dal 1996 a véd la luś na compilation remix di sò braṅ più famóś, Sabrina Remix 1996, publicàda par la cà discugrafica RTI Music. Sabrina la tórna anc a lauràr in televiśiòṅ insém a Jocelyn in dal game-show Il grande gioco del mercante in fiera (al gran śóg dal marcànt in féra), traśmìs par TMC.

In dal 1997 l'è a teàtar cun la cumèdia Uomini sull'orlo di una crisi di nervi e in dl'istâ d'l an dòp la fà còpia cun Carlo Conti in dal show ad Rai 1 Cocco di mamma.

In dal 1999 la fà gnir fóra in Itaglià e in Spaggna un nóṿ àlbum, A Flower's Broken ma al disc al n vénd minga cum a s pinsàva, anc s'al prim sìngul, I Love You, 'l iva fat un pòc ad stus parchè na Sabrina cavàda śò la baśàva un robot dóna che pò la dvénta na fémna dabòṅ. Sèmpar in c'l an lè la gh'à na part in dal film di 883 Jolly Blu.

I an Dumìla

Dal 2001 al 2003 l'è stada impgnàda cun sucès insém a Ambra Angiolini e Vladimir Luxuria in teàtar cun al musical Emozioni ad Sergio Japino.

In dal 2002 l'è in dal cast dal prugràma 'd Italia 1 Matricole & Meteore in du la fà l'inviàda in gir p'r al mónd a intervistàr di persunàǵ daśmindgâ da tut cuma Gary Coleman, Jimmy Sommerville e Charlene Tilton.

Du an dòp la dvénta mama par la prima vòlta: al sò putèṅ al s ciàma Luca Maria e la'l abû dal sò cumpàgn Enrico Monti spuśâ in dal 2006, an in du la tórna a cantàr faghénd gnir fóra al sìngul I Feel Love (Good Sensation).

Al ritóran uficiàl a la mùśica 'l è dal 3 'd Utóbar dal 2008 quand la fà catàr in di negòsi al greatest hits dòpi Erase/Rewind Official Remix par l'etichéta Edel: al prim CD al gh'à dèntar trédas pès dal pasâ cantâ incóra in ciaṿ mudèrna mèntar al secónd CD al cuntèṅ trédas braṅ nóṿ. Al sìngul 'l è Erase/Rewind di The Cardigans.

In dal Śugn dal 2010 la fà còpia cun Samantha Fox e la canta al braṅ di Blondie Call me e in Luj la cundùś quàtar puntàdi dla traśmisiòṅ 'd Italia 1 Mitici 80.

Discugrafìa

Album

  • 1987 - Sabrina
  • 1988 - Super Sabrina
  • 1988 - Something Special
  • 1990 - Super Remix
  • 1991 - Over the Pop
  • 1996 - Maschio dove sei
  • 1999 - A Flower's Broken
  • 2008 - Erase/Rewind Official Remix

Sìngui

  • 1986 - Sexy Girl
  • 1987 - Lady Marmalade
  • 1987 - Boys (Summertime Love)
  • 1987 - Hot Girl
  • 1988 - All of Me (Boy Oh Boy)
  • 1988 - My Chico
  • 1988 - Like a Yo-Yo
  • 1988 - Sex
  • 1988 - Pirate Of Love
  • 1989 - Gringo
  • 1990 - Yeah Yeah
  • 1991 - Siamo donne
  • 1991 - Shadows of the Night
  • 1991 - Cover Model
  • 1994 - Rockawillie
  • 1994 - Angel Boy
  • 1995 - Boys '95
  • 1996 - Fatta e rifatta
  • 1999 - I Love You
  • 2006 - I Feel Love (Good Sensation)
  • 2008 - Erase/Rewind
  • 2009 - Erase/Rewind (rimixâ p'r Andrea T Mendoza vs Tibet)
  • 2010 - Call Me (insém a la Samantha Fox)

Picture Disc

  • 1987 - Boys (Summertime Love)
  • 1988 - Hot Girl
  • 1987 - Super Sabrina
  • 1988 - Interview (limited edition made in London)
  • 1988 - Something Special
  • 1988 - Sex
  • 1989 - Gringo
  • 1990 - Yeah Yeah
  • 1991 - Over The Pop
  • 1991 - Shadows of the Night
  • 2010 - Call Me (insém a la Samantha Fox)

Dal viṿ

  • 1988 - Sabrina live on stage
  • 1989 - Sabrina Live in Moscow

Televiśiòṅ

  • 1984 W le donne, Canale 5, Retequattro
  • 1985 Premiatissima, Canale 5
  • 1986 Grand Hotel, Canale 5
  • 1987 Sandra e Raimondo Show, Canale 5
  • 1990 Ricomincio da 2, Rai Due
  • 1991 Bellezze sulla neve, Canale 5
  • 1992 Bellezas en la nieve, Telecinco
  • 1996 Il grande gioco del mercante in fiera, TMC
  • 1998 Cocco di mamma, Rai Uno
  • 2002 Matricole & Meteore, Italia 1
  • 2010 Mitici 80, Italia 1

Filmugrafìa

Teàtar

Culegamènt estéran