C'l artìcul chè 'l è scrit in Miranduléś Emiliàn


Peter Steele, Peter Thomas Ratajczyk l'è al sò nóm vér, (Brooklyn, 4 ad Śnar dal 1962 – 14 'd Avrìl dal 2010) l'è stâ un cantànt e basìsta americàṅ mèmbar dal grup Gothic metal Type O Negative.

La vóś ad Steele, cun un tìmbar dimóndi bas, 'l è òṅ di sò ségn distintìṿ (insém a 'l altésa, du mètar) ch'l'iva réś ùnic al stil dal grup in du 'l iva sunâ.

Peter Steele

Biugrafìa

In dal 1979 al mét sù un grup ciamâ Fallout insém a Josh Silver, John Campos e Louie Beateaux ma al fà gnir fóra sól un sìngul e pò lì lōr i s mòlan in dal 1982. Sèmpar in c'l an lè, al fà 'n àtar grup cun Beateaux, i Carnivore, na band speed/thrash metal e Peter al scriv anc i tèst ch'i dascóran ad guèra, religiòṅ, rasi e còntra al dóni.

La band la fà gnir fóra un disc umònim in dal 1985 e 'n àtar ciamâ Retaliation ma 'l è un fóg ad paja anc quést e i Carnivore i s dìsfan du an dòp.

In dal 1989, insém a Silver, Sal Abruscato e Kenny Hickey al mét sù 'n àtar grup metal, i SubZero, ma 'l è custrét a cambiàr-ag nóm parchè a gh 'n éra bèla òṅ ch'al s ciamàva acsè.

Al nóm nóṿ 'l è Type O Negative e 'sta vòlta al ròbi i gìran p'r al vèrs giùst. Al grup al fà gnir fóra siē àlbum ad studi e du racòlti prima ad dla tragèddia ch'la cùlpis al cantànt: al 15 'd Avrìl dal 2010 i vènan fóra dal vóś ch'i dìśan che Steele al sia mòrt p'r un atàc al cór. Al tastérista dal grup, Josh Silver, purtròp al diś ch'l è véra.

In d'l Agóst dal 1995 'l à fat scalpór parchè 'l iva puśâ nud par la rivìsta Playgirl.

Discugrafìa

cun i Carnivore

  • 1984 - 1984 demo (demo)
  • 1986 - Carnivore
  • 1986 - Nuclear Warriors (demo)
  • 1986 - U.S.A. for U.S.A. (EP)
  • 1987 - Retaliation

cun i Type O Negative

  • 1992 - The Origin of the Feces
  • 1993 - Bloody Kisses
  • 1996 - October Rust
  • 1999 - World Coming Down
  • 2000 - The Least Worst Of (racòlta)
  • 2003 - Life Is Killing Me
  • 2006 - The Best of Type O Negative (racòlta)
  • 2007 - Dead Again