Artécol in dialèt arzân

Gino Cervi Ind i pâgn ed Pepòun

Pepòun, fêls scutmâj ed Giuseppe Bottazzi l’è sèimper in lôta cun Don Camél ind la sèria dal stòri scrèti da Giovannino Guareschi e ambientèe a Bresèl, ind la valêda del fióm Po apèina dôp la secònda guèra mundiêla.

Spusèe con Maria e pêder ed quâter fiô (Walter, Michele, Libero-Camillo-Lenin e Anna), Pepòun l’é un artigiân (fréra e mecânich), padròun ed ‘na cèca ufîcina mecânica (che ind i ân ed la ṣlarghêda econômica al dvintarà ‘na mòstra dal machîni cun negôsi d’e-letrodomèstich). Iscrét al PCI, Pepòun al vîns al j-elesiòun e al dvèinta séndech ed Bresèl.

Mìa tânt struvî mó dotèe in môd straordinâri ind la capacitèe d’ urganiṣêr i compâgn ed partî, Pepòun a’gh ‘l a chêva dimòndi bèin ind al só cûmpit d' aministradōr , mó sèimper cun l'ajót dal só aversâri polétich. I dû, se da ‘na pêrt în sèimper prûnt a quistiunêr, convînt, in môd dûr, ‘d la bontèe ‘d la prôpria posisiòun, a la fîn a’gh’ ‘l a chêven pó a 'cumudêr e a catêr ‘na solusiòun ch’ a i mèt d'acôrdi.

Al stòri che vînen cuntêdi da Guareschi a’s fân vèder un personâg carateréstich, pîn ed cla tèpica sinceritèe emiliâna, in pêrt ridécol e in pêrt a tót al manēri familiêr. Ind la versiòun pr'al cinêma, Pepòun l’é interpretèe da l’ atôr Gino Cervi. In realtèe, al prém candidèe a la pêrt ed Pepòun l’è stèe l’ istès Guareschi, che però al s’è fât cgnòser subét mìa adât a recitêr davânti a‘na machîna da cínema.

Colegamèint modifica