C'l artìcul chè 'l è scrit in Miranduléś Emiliàn

Peer Steinbrück


Peer Steinbrück (Ambûrg, 10 ad Śnar dal 1947) 'l è un pulìtic tedésc dal partî sucialìsta (SPD).

'L à fat al minìstar dl'ecunumìa par la Merkel in dal guèran dla große koalition (cualisiòṅ grôsa) da 'l 2005 a 'l 2009, prima 'd lasàr la sò scrana a Wolfgang Schäuble.

Biugrafìa

Dòp ès'r-as diplumâ in dal 1968 e avér fat al militàr par dū an, Steinbrück al s iscrìv a 'l partî sucialìsta tedésc in dal 1969 par pò tacàr a studiàr ecunumìa e siénsi suciàli a l'università ad Kiel, laureànd-as in dal 1974.

Tgnénd a drē a 'l puśisiòṅ 'd Helmut Schmidt e ad Johannes Rau, al taca a lauràr p'r al sò partî tulénd-'s a càrag di lavursèṅ a la fiṅ di an Stanta.

Da 'l 1985 a 'l 1986 'l è stâ al respunsàbil par la pulìtica nasiunàla ecunòmica in dla grup mis in pē a 'l ministēr d'l ambiènt e dl'agricultùra dla Renàgna dal Nòrd-Vestfàglia, par pò dvintàr cap ad gabinét par Johannes Rau. In dal Nuvémbar dal 2002 al dvénta lò al presidènt ad cla regiòṅ lè. Al gh rèsta in fiṅ a 'l 2005 quànd i gh dànan 'l incàrag ad minìstar dl'ecunumìa in dla große koalition misa in pē par l'Angela Merkel dla CDU ch'l'iva parśâ cun Gerhard Schröder dla SPD.

Al 28 ad Setémbar 2012 al sò partî 'l al sarnìs par candidàr-al a dvintàr canselēr dal sò paéś a gl'elesiòṅ tedéschi dal 2013.

Dòp 'l èśit di Elesiòṅ pulìtichi itagliàni dal 2013, dascurénd ad Silvio Berlusconi e ad Beppe Grillo, al diś la sua: «A gh'ò dla scarésa adòs par la vìnsida ad dū pajàs».

Culegamènt estéran