C'l artìcul chè 'l è scrit in Miranduléś Emiliàn

Dū Pés pajàs (Amphiprion ocellaris) in mèś a n'anèmuna 'd mâr (Heteractis magnifica)


I Pés pajàs (nóm sientìfic dla sót-famìja Amphiprioninae) i èṅ un grup ad pés dla famìja Pomacentridae ch'i vìv'n in di Usèan Indiàṅ e Pasìfic. I èṅ ciamâ acsè parchè i gh'aṅ di còrp dimóndi culurâ cuma di pajàs, aràns cun dal bandi biànchi e négri. L'è na bèstia „trans“ parchè la pōl cambiàr ad sès.

Descrisioṅ

A s trata 'd un pés ch'a gh piàś vìv'r insém a chi àtar dla sò rasa. A cap dal branc ad sòlit a gh'è na fémna ch'la cmanda. Sōl al masć ch'al stà sèg al s dà da far par far di fiōi méntar chi àtar, minga madūr da cal punt ad vista lè, i gìran dintór'n a di anèmuni 'd mâr che, esénd pîni 'd un vlèṅ ch'a lōr a n gh fà gnint, i pàran via tut i predadōr. Quànd la fémna la mōr, al sò spóś al tōś al sò pòst dvintànd un pés dóna.

Al Pés pajàs al s lóga in di tentàcui dl'anèmuna 'd mâr par prutéś'r-as ma anc a lē a gh fà còmad parchè i pés i la tînan pulìda da i rèst dal magnàr cavànd-ag via i parasìta. Quànd l'è óra i óṿ i vìn'n inculâ a i pē dl'anèmuna.

I pés prutagunìsta dal film 'd animasiòṅ dla Pixar Alla ricerca di Nemo i èṅ pròpria di pés pajàs, dla spécie Amphiprion ocellaris p'r èsar precìś.

Culegamènt estéran