C'l artìcul chè 'l è scrit in Miranduléś Emiliàn

Al tri cumbinasiòṅ dal śōg (in itagliàṅ)


La morra cinéśa 'l è 'n śōg ch'al s fà druànd al maṅ, da spés fat da i baghét. 'L è cgnusû anc cuma carta-fòrbśa-giaròṅ da 'l nóm dal tri cumbinasiòṅ ch'i s pōlan far, a difarénsa dal śōg dal pâr e dìspar ch'l è praticamènt cumpàgn ma cun sōl dū cumbinasiòṅ.

Règhli dal śōg

I dū śugadōr i tìnan śò 'l pugn e òṅ al taca a dir «Mor-...ra-...ci-...né-...śa!». Finìda la fraś i śugadōr i gh'aṅ da far védar subìt la maṅ sarnénd una dal cumbinasiòṅ dal śōg ch'i èṅ:

  • giaròṅ: pugn sarâ
  • carta: maṅ avèrta e dastéśa
  • fòrbśa: maṅ a “V” fat c'n i mèdi e ìndas.

Se i dū śugadōr i aṅ sarnî na cumbinasiòṅ cumpàgna, al śōg 'l è para e a gh'è da tacàr da cap o sinò a gh'è da guardàr chi à fat la cumbinasiòṅ ch'la vins su cl'atra, tgnénd cònt che la fòrbśa la vins su la carta, la carta la vins su 'l giaròṅ e 'l giaròṅ al vins su la fòrbśa.