Mandy Minella
|
C'l artìcul chè 'l è scrit in
Miranduléś |
.jpg)
La Mandy Minella (Esch-sur-Alzette, 22 ad Nuvémbar dal 1985), fiōla ad Mario e dl’Anna, l'è na tenìsta dal Lussembûrgh ch'l'è stada bòna ad rivàr a èsar la nùmar ssanta-siē dal mónd, al 17 ad Setémbar dal 2012. La dascór in Lusemburghéś, Tedésc, Francéś, Ingléś e Itagliàn.
L'è élta 180 cm e la péśa 65 chilo. La dróa al bras dèstar e la tira 'l arvèrs a dū maṅ.
In dla sò caréra l'à vins un tìtul WTA in dópi e sèt ITF in singulàr e siē in dópi.
Caréra
La Minella la śōga in di prim an, da 'l 2001 in avànti, sōl in dal sircùit ITF, faghénd-'s acsè i òs. Al sò prim incónt'r in un turnèo WTA 'l è in dal Favràr dal 2005 a Hyderabad in dua la pèrd da l'Anna-Lena Groenefeld 3-6 4-6. La pasa al qualificasiòṅ anc a Hasselt ma pò la céd subìt a la Roberta Vinci.
I pàsan tri an e par turnàr in si camp WTA la gh'à da spetàr na carta salvàdga par śugàr in d'l Utóbar dal 2008 al turnèo ad cà dal Lussembûrgh ma pò la s cata davànti la Na Li e la pèrd subìt 2-6 1-6. Cun 'n àt'r invîd in bisàca la gh próa anc 'l an dòp e anc 'sta vòlta la n gh la cava briśa a vìnsar la sò prima partìda, lasànd strada a la spagnōla Carla Suárez Navarro 5-7 7-5 3-6.
In d'l Agóst dal 2010 la śōga 'l qualificasiòṅ di US Open e la i pasa e pò la vins al sò prim incóntar in dal sircùit prinsipàl baténd la śluvéna Polona Hercog par 6-4 7-5. La gh tōś gust e la fà fóra anc la bulgra Cvetana Pironkova (nùmar 34 dal mónd) par 6-4 6-0 ma pò a 'l tèrs tùran la cata la Venus Williams ch'la gh'à la méj sèg 6-2 6-1. Cum al sòlit la ciàpa na carta salvàdga par śugàr dirèt in Lussembûrgh ma gnanc 'sta vòlta la gh la cava a 'ndàr avànti, ciapànd la paga da la Julia Görges. La sèra 'l an a 'l 133śum pòst.
In dal 2011 la taca a śugàr da spés al qualificasiòṅ ma a gh và sèmpar mâl parchè la pèrd da l'Alberta Brianti a Auckland, da l'Ol'ga Govorcova a Hobart, da l'Arina Rodionova a gl'Australian Open, da la Corinna Dentoni a Acapûlc, da la Zuzana Kučová a Stucàrda, da l'Eleni Daniilidou a 'l Roland Garros, da la Natalie Piquion a Wimbledon e da la Ekaterina Bychkova a gl'US Open. In Maǵ la próa anc a 'ndàr dént'r a 'l tablòṅ prinsipàl d'l ITF ad Réś ma la n gh la cava mia. In Setémbar la gh'à i punt abàsta par śugàr dirèt a Tashkent e a Cantón ma l'è bòna ad vìnsar sōl 'n incóntar cun la nùmar 382 dal mónd. Finalmènt la pasa na qualificasiòṅ a Tokyo e lè la bat anc la giapunéśa Kimiko Date-Krumm a 'l prim tùran ma pò la pèrd da la nùmar siē dal mónd Petra Kvitová 2-6 3-6. In Utóbar la mét in fila àtar dū prim tùran, dand a védar che la sò caréra la fà fadìga a tōr al vōl.
In dal 2012 la pasa dū tùran a Monterrey ma pò la s férma in di quàrt quànd la Sara Errani la la bat 6-1 6-2. Stés quèl anc a Budapèst: 6-1 6-1 par la rumagnōla. A 'l Roland Garros la céd invéci a la Jaroslava Švedova par 3-6 4-6. In Śugn la riva in semifinàl a Bad Gastein pardénd cóntar la Yanina Wickmayer e pò in Luj la śōga pardénd i quàrt a Baku cóntar l'Ol'ga Pučkova. La pasa dū tùran anc a i US Open e acsè la finìs 'l an da nùmar stanta-sinc dal mónd.
In dal 2013 la riva in di quàrt a Bugutà. In Avrìl la śōga tri turnèo WTA in sla tèra: a Charleston (vérda) la pèrd a 'l prim tùran da la Camila Giorgi 4-6 4-6, a Katowice la céd a 'l secónd tùran a la Petra Kvitová (pò finalìsta) par 5-7 2-6, a Marrakesh la riva in semifinàl lasànd strada a la Lourdes Domínguez Lino a 'l tèrs sét, ma la pōl pò cuntintàr-as listés cun al tìtul in dópi insém a la Tímea Babos, 6-3 6-1 a la Petra Martić e a la Kristina Mladenovic.