C'l artìcul chè 'l è scrit in Miranduléś Emiliàn

Fulci, c'n al capèl in cô, tòlt śò insém a 'l regìsta tedésc Andreas Schnaas


Lucio Fulci (Róma, 17 ad Śugn dal 1927 - Róma, 13 ad Mars dal 1996, a s lèś [ˈlutʃo ˈfultʃi] in itagliàṅ) 'l è stâ 'n regìsta, senegiadōr, prudutōr, atōr, parulēr e scritōr itagliàṅ.

Biugrafìa

La sò caréra da regìsta l'è tacada a la fiṅ di an Sinquànta dòp ès'r-as laureâ in Létri e Filuśufìa, al frequentàva sèrt ambînt ad sinìstra ligâ a 'l PCI, e avēr culaburâ cuma giurnalìsta a Il Messaggero.

I sò prim lavōr i éran dal cumèdi fati cun di atōr impurtànt in cal camp lè cuma Totò, Franco Franchi, Ciccio Ingrassia, Raimondo Vianello, la Sandra Mondaini, Walter Chiari, la Franca Valeri e Adriano Celentano (par lò 'l à scrit i tèst ad 24.000 baci e Il tuo bacio è come un rock).

Fulci in na figùra dal film “Un gatto nel cervello” in du 'l è anc 'l atōr prutagunìsta

In séguit 'l à cuntinuâ c'n al cìnema 'd “gènar” cun di lavōr ch'i pasàvan da 'l śal (Una sull'altra, Una lucertola con la pelle di donna e Non si sevizia un paperino) a i western (Le colt cantarono la morte e fu... tempo di massacro), da 'l fantàstic (Conquest e I guerrieri dell'anno 2072) a i thriller (Sette note in nero), da la cumèdia spurcaciòna a l'itagliàna (Nonostante le apparenze... e purché la nazione non lo sappia... All'onorevole piacciono le donne e La pretora, c'n al prim nûd dl'Edwige Fenech) a 'l pelìculi 'd scarésa in du 'l è dvintâ famóś a livèl internasiunàł cun la sò “Trilugìa dla mòrt” di an Utànta ch'la mitìva insém Paura nella città dei morti viventi (1980), ...E tu vivrai nel terrore! L'aldilà (1981) e Quella villa accanto al cimitero (1981).

Da spés 'l è stâ custrét a far i cònt cun di budget dimóndi stric e cun di prubléma 'd salùt (al gh'iva 'l diabēt), mâł ch'al 'l à prurtâ via pròpria quànd al gh'iva da turnàr in di cìnema c'n un film prudót par Dario Argento, M.D.C. - Maschera di cera dirèt pò par Sergio Stivaletti tgnénd adrē a la sò senegiadùra.

Culegamènt estéran