C'l artìcul chè 'l è scrit in Miranduléś Emiliàn

Emerson tòlt śò in dal 1992


Keith Noel Emerson (Todmorden, 2 ad Nuvémbar dal 1944 - Santa Monica, 10 ad Mars dal 2016), 'l è stâ 'n cumpuśidōr e tasterìsta ingléś, cgnusû p'r avér dâ vita in di an Stanta a 'l grup ad rock progressive di Emerson Lake & Palmer.

'L è stâ òṅ di prim a druàr a la sò manéra 'l òrgan Hammond e i sintetiśadōr Moog.

Biugrafìa

Carsû a Worthing, in dal Sussex, Keith al crés cun la pasiòṅ p'r al piàṅ tgnénd adrē a gl'òpri ad Johann Sebastian Bach, ad Sergej Prokof'ev, ad Dave Brubeck e 'd Art Tatum.

Keith in dal 2008

Dòp 'n inìsi c'n al grup di The Nice, Emerson al dà vita in dal 1970 a 'l grup di Emerson Lake & Palmer insém a 'l chitarìsta, cantànt e basìsta di King Crimson Greg Lake e a 'l baterìsta di Atomic Rooster Vincent Crane. Sèg al riva a 'l sucès e 'l fà vgnir fóra déś àlbum in studi.

In di an Utànta al taca na caréra da par lò faghénd anc dal culòni sunóri par soquànt film ad scarésa 'd regìsta itagliàṅ cuma Inferno ad Dario Argento (1980), Murderock uccide a passo di danza ad Lucio Fulci (1984) e La chiesa ad Michele Soavi (1989).

In dal 1986 al tórna a lauràr cun Lake dand vita a 'l prugèt Emerson, Lake & Powell in dua 'l èx baterìsta di Black Sabbath Cozy Powell al tulìva 'l pòst ad Carl Palmer ma pò in di an Nuànta al mét in pē incóra i Emerson Lake & Palmer.

In dla nòt fra 'l 10 e 'l 11 ad Mars dal 2016, a 71 an, Emerson al s tira na sćiuptàda in cô in dla sò cà 'd Santa Monica darènt a Los Angeles. 'L éra dimóndi śò parchè al gh'iva 'n brut mâł a 'l maṅ ch'al gh dava di prubléma a sunàr e 'l éra destinâ a 'ndàr sèmpar pèś.

Culegamènt estéran