C'l artìcul chè 'l è scrit in Miranduléś Emiliàn

Slaughter High
Jolly Killer

Billy Hartman in na figùra dal film
Jolly sasèṅ
1986
Regìa: Mark EzraPeter LittenGeorge Dugdale
Scritōr: Mark Ezra • Peter Litten • George Dugdale
Atōr: Simon ScuddamoreCarmine Iannaccone
Caroline MunroDonna YeagerGary Martin
Billy HartmanGary MartinMichael Safran
Müsica: Harry Manfredini
Léngua: Ingléś
Dürä dal film: 91 minüt
Nasiōṅ: Régn UnîStat Unî


«
Par cupàr, Marty al ciàpa 'n puntéǵ ad déś su déś.»
(Tagline dal film)


Jolly Killer (Jolly sasèṅ) 'l è 'n film ad scarésa americàṅ e britànic dal 1986 scrit e dirèt par Mark Ezra, Peter Litten e George Dugdale.

Al film 'l è stâ girâ in Inghiltèra e dimóndi atōr i dróan chè di asènt americàṅ fals. Al prutagunìsta Simon Scudamore al s è pò tòlt la vita subìt dòp ch'al film 'l è stâ prudót, in dal 1984.

Sunt

'L è 'l prim 'd Avrìl e la Carol Manning (Caroline Munro), 'd acòrd cun soquànt amìg dla scóla, la decìd ad tiràr un brut schèrs a 'l nerd Marty Rantzen (Simon Scuddamore) faghénd-ag crédar ch'la vōl gusàr sèg in dal bagn dal fémni. Dòp avér-al fat cavàr śò e avér-ag dit 'd èsar prònta, al ragàs al tira la ténda ma da cl'atra banda al cata sōl i sò cumpàgn ad scóla ch'i gh rìd'n adrē e ch'i al tìran śò c'n al bìgul ad fóra. Cuma s'a n fus minga abàsta, dū ragàs i al ciàpan p'r i pē e i gh pùcian la tèsta śò in dal cèso tirànd anc l'àqua. A riva lè 'l prufesōr ad ginàstica (Marc Smith) ch'al gh siga adrē, specialmènt a Skip Pollack (Carmine Iannaconne) ch'al s éra mis adòs anc la mascra 'd un jolly, e pò al i mét in punisiòṅ.

Par vindicàr-as Skip al vèrsa dla pólvra in na pruvéta che Marty 'l éra drē a preparàr par far 'n esperimènt ad chìmica. A sucéd acsè ch'a ciàpa fōg incòsa e 'l ragàs, pruànd a saràr al tub dal gas, al s tira adòs un vaś 'd acìd armagnéd uféś in dla ghigna.

I pàs'n i an e, dòp avér ricevû tut un bijét 'd invîd, nóṿ di prutagunìsta dal burli a Marty i s càt'n insém a la vècia scóla andàda in cal mént'r in malóra. Là a gh'è 'n manìac vistî da jolly ch'l i vōl far fóra tut, a òṅ a òṅ. Durànt la nòt a s śònta anc la Nancy (Kelly Baker) ch'la riva p'r ultma.

Culegamènt estéran