Eugenie Bouchard
|
C'l artìcul chè 'l è scrit in
Miranduléś |
.jpg)
L’Eugenie Bouchard (Westmount, 25 ad Favràr dal 1994) l'è na tenìsta canadéśa, cgnusùda anc c'n al nóm scurtâ ad “Genie” (Gèni). La dróa al bras dèstar e la tira 'l arvèrs a dū maṅ. L'è élta un mét'r e stant'òt, la péśa ssant'òṅ chilo e la s è stablìda a Montréal. I sò cantànt preferî i èṅ Justin Bieber, Jay-Z, Miley Cyrus and Kanye West.
In dla sò caréra, in dua l'è rivàda a èsar la nùmar sinc dal mónd al 20 'd Utóbar dal 2014, l'à mis in bisàca un tìtul WTA internasiunàł a Nurimbèrga in da Maǵ dal 2014 baténd la Karolína Plíšková par 6-2 4-6 6-3. Sèmp'r in dal 2014 l'è rivàda anc in finàł a Wimbledon in dua l'à pò pardû da la Petra Kvitová par 3-6 0-6. La pōl cuntàr inóltar su siē tìtui ITF.
Caréra
La taca a pistàr i camp da tènis ITF e WTA in dal 2008 in dua la śōga sinc incóntar sénsa vìnsar gnanc un sét. 'L an dòp la fà sù quàtar punt in tut p'r al sò ranking. In dal 2009 la śōga gl'ITF ad Burnie e ad Osprey in dua la pèrd da la Sema e da la Capra. La sèra 'l an a la puśisiòṅ 538 dal mónd.