Black Book
|
C'l artìcul chè 'l è scrit in
Miranduléś |
 Zwartboek
| ||
| Black Book | ||
 La van Houten e Koch in na figùra dal film | ||
| Lìbar négar 2006 | ||
|---|---|---|
| Regìa: Paul Verhoeven | ||
| Scritōr: Gerard Soeteman • Paul Verhoeven | ||
| Atōr: Carice van Houten • Sebastian Koch Matthias Schoenaerts • Peter Blok • Halina Reijn Christian Berkel • Gijs Naber • Waldemar Kobus Thom Hoffman • Derek de Lint • Michiel Huisman Johnny de Mol • Dolf de Vries • Frank Lammers | ||
| Müsica: Anne Dudley | ||
| Léngua: Ingléś • Ulandéś • Tedésc • Ebràic | ||
| Dürä dal film: 127 minüt | ||
| Nasiōṅ: Ulànda • Régn Unî • Germâgna • Bélgi | ||
Black Book (Lìbar négar) 'l è 'n film dramàtic dal 2006 ad Paul Verhoeven ambintâ durànt la secónda guèra mundiàla. Al film al n cònta minga na stòria véra ma Verhoeven 'l à dit che soquànt di fat i èṅ sucès dabòṅ.
A s trata dal film più custóś fat in Ulànda esénd custâ da piò ad vint migliòṅ 'd euro. In dal sò paéś 'l è anc stâ qvél più vdû ad sèmpar e anc qvél ch'l à muciâ da piò ad tut, da piò 'd un migliòṅ ad spetadōr e ad déś migliòṅ 'd euro a rivàr a 'l 27 ad Maǵ dal 2007. Inóltar 'l à fat sù quàtar migliòṅ e tri ad dòlar in di Stat Unî, un migliòṅ e dū ad sterlìni in dal Régn Unî e óltar sèt migliòṅ 'd euro in dal rèst dal mónd.
Sunt
Soquànt tèmp prima dla fiṅ dla secónda guèra mundiàla, la cantànta ebrèia Rachel Stein (Carice van Houten) la scapa via da Berlîṅ par lugàr-'s in Ulànda. La ragàsa la créd 'd èsar a 'l sicûr da i naśìsta ma al sò nascundìli al vèṅ bumbardâ e lē l'armàgn acsè sénsa cà. La próa alóra a tōr na barchéta insém a la sò famìja e a di àt'r ebrèi par pasàr da cl'atra banda dal paéś, qvéla a sud in alóra libra par 'l intervènt di aleâ, ma l'è na trapla di tedésc ch'i màsan tut par purtàr-ag via incòsa. Sōl lē la scampa a 'l masàcar méntar sò pàdar, sò màdar e sò fradèl i mōran lè.
Rivàda a L'Àia, la càmbia nóm in Ellis de Vries e la s śònta a qvéi dla reśisténsa. Al sò còmpit 'l è qvél ad far inamuràr ad lē al cap di servìsi ad sicurésa di SS, Ludwig Müntze (Sebastian Koch), par dasquaciàr i piaṅ ch'i gh'aṅ in tèsta i tedésc. A finìs però che anc la Rachel la s inamóra ad lò ch'al n è briśa catìṿ cum i sò cumpàgn. La n sà minga se tgnir la sò part o qvéla di partigiàṅ. Al ròbi i dvènt'n incóra più dificìi par lē quànd un tentatìṿ ad libràr quarànta parśunēr ulandéś al finìs in dal sangṿ.