Best Laid Plans (film 1999)

C'l artìcul chè 'l è scrit in Miranduléś Emiliàn

Best Laid Plans

Nivola e la Witherspoon in na figùra dal film
I piàṅ mijōr
1999
Regìa: Mike Barker
Scritōr: Ted Griffin
Atōr: Alessandro NivolaReese Witherspoon
Josh BrolinGene WolandeMichael McCleery
Jamie MarshRocky CarrollTerrence Howard
Müsica: Craig Armstrong
Léngua: IngléśSpagnōl
Dürä dal film: 92 minüt
Nasiōṅ: Stat Unî


«
Al relasiòṅ i pōl'n anc masàr.»
('Tagline dal film)


Best Laid Plans (I piàṅ mijōr) 'l è 'n film dramàtic americàṅ dal 1999 ad Mike Barker.

Custâ sèt migliòṅ ad dòlar, al film 'l à muciâ sù sōl vintsènt-mila dòlar.

Sunt

Bryce (Josh Brolin) 'l è 'n śōvan, ric ad famìja, ch'al vōl far caréra faghénd al prufesōr 'd ingléś. Na sira al pasa a catàr un sò vèć amìg da i tèmp dl'università, Nick (Alessandro Nivola), par bévar quèl a 'l bar dal sò paiśèṅ, Tropico, e far dū ciacri sèg. A n sèrt punt in dal bar a riva na ragàsa ch'la diś 'd ciamàr-as Kathy (Reese Witherspoon) ch'la taca a dascórar cun Bryce méntar Nick al s tōś sù da lè par turnàr a cà. Durànt la nòt Bryce al déśda 'l sò amìg cun na telefunàda in du al gh'admànda 'd andàr da lò in présia parchè al gh'à 'n prubléma grôs da cuntàr-ag.

Quànd al riva in dla sò vila Bryce al gh diś ch'l iva purtâ la ragàsa da lò par far sès anc s'l éra mèś imbariàg. Finìda la gusàda la Kathy la gh'iva dit ch'la sarév andàda subìt a denunsiàr-al par viulénsa sesuàla esénd che chi lē la n vliva più cuntinuàr ma lò 'l iva tirâ drit listés anc s'al n s arcòrda minga bèṅ qvél ch'l è sucès par via dla ciùca. A cal punt lè, p'r a n avēr minga la sò vita ruinàda, 'l óm 'l iva decìś ad saràr-la dènt'r in cantìna par pò decìdar cuśa far.

Soquànt stmani prima Barry (Jamie Marsh), un culéga 'd Nick ch'al lavóra sèg in n'ìśula eculògica in du a s ricìcla 'l rusc, al gh'iva dmandâ 'd jutàr-'l in un piàṅ par far sù di bèsi fàcii: fargàr dla cucaìna in dla cà 'd un boss dla dròga (Rocky Carroll). Purtròp par lōr al boss al gh l'iva cavàda a bcar-i e p'r a n far-ag minga dal mâł al vliva indrē da Nick la sò part, quìndas-mila dòlar. Esénd chi lò un buletàri, ch'al n pōl gnanc cuntàr su l'eredità 'd sò pàdar, Nick 'l iva strulgâ 'n piàṅ insém a la sò muróśa Lissa, ch'a s capìs èsar la Kathy, par fargàr di bèsi antìg in dla cà 'd Bryce. Ma, par far-al, 'l éra méj far-ag patìr un brut spaj par far-al taśēr par sèmpar, da lè la pinsàda dla viulénsa sesuàla.

Culegamènt estéran