Bella, ricca, lieve difetto fisico, cerca anima gemella

C'l artìcul chè 'l è scrit in Miranduléś Emiliàn

Bella, ricca, lieve difetto fisico,
cerca anima gemella

Carlo Giuffrè e la Marisa Mell in na figùra dal film
Bèla, rica, difèt fìśic da gnint,
la pésca l'anma śmèla

1973
Regìa: Nando Cicero
Scritōr: Steno • Sandro Continenza
Marino Onorati • Nando Cicero
Atōr: Carlo GiuffrèMarisa MellNino Terzo
Renato PinciroliRenato MalavasiErika Blanc
Elena FioreUgo FangareggiAlfonso Tomas
Müsica: Carlo Rustichelli
Léngua: ItagliàṅNapulitàṅEmigliàṅSicigliàṅ
Dürä dal film: 90 minüt
Nasiōṅ: Itàglia


«
Al difèt impunènt al 'l à lasâ imputènt a 'l prim cōlp 'd òć.»
(Tagline dal film)


Bella, ricca, lieve difetto fisico, cerca anima gemella (Bèla, rica, difèt fìśic da gnint, la pésca l'anma śmèla) l'è na cumèdia dal 1973 ad Nando Cicero.

Sunt

Michele Fiore (Carlo Giuffrè), spuśâ cun la Rosaria (Erika Blanc), 'l è 'n napulitàṅ ch'al scampa fargànd cal dóni ch'i métan di anùnsi in si giurnài par catàr marè faghénd-ag crédar ch'al gh'à intensiòṅ ad spuśàr-li prèst par pò purtàr-ag via di bèsi. P'r èsar più sicûr 'd andàr a ségn al li pésca cun di difèt fìśic.

Un dè al s véd cun na budlòna ch'la gh'à 'n pòr in dla ghigna e na gamba più curta 'd cl'atra, la Teresa Pescosolido (Elena Fiore). Chi lē l'è védva da déś an tant ch'adès la gh l'à srada, al 'l à dit anc al dutōr. Par cal mutìṿ chè a gh'è vgnuda na fam acsè granda ch'la mòrśga i óm, anc i prēt. Michele, druànd al nóm fals ad Giorgio, al gh pòrta via un migliòṅ ad franc.

N'atra dóna ch'la gh'à dâ apuntamènt l'è la sora Checca (Gina Rovere), na maslàra “coatta” e 'n dunòṅ in carna c'n al prubléma che quànd la magna a gh và dl'ària in dla pansa, in pôchi paròli l'è na scurśóna patintàda e la rudga anc. Quànd a 'l risturànt i gh pòrt'n al caviàł c'n i faśōi, a Michele i gh vèn'n i śgriśōr, pò quànd i tàc'n a balàr al Tuca Tuca, cun la Checca ch'la s piga tuta c'n al cûl a l'ària, i partìsan dal scuréśi una adrē a cl'atra ch'l'è na belésa. Ma i dū migliòṅ ad franc ch'al gh'iva dmandâ al n i ciàpa briśa parchè al n è minga stâ bòṅ ad ciulàr-la esénd ch'in dla sèla dal freezer a gh s è ślâ incòsa.

Michele al tórna a casa 'd dóni rispundénd a la Paola (Marisa Mell), n'emigliàna ch'l'è 'n pès ad figa da nuànta ch'la gh fà prilàr la tèsta. A cà sua però a spétar-i a gh'è soquànti dóni rabìdi dal “MO-LI-FE”, muimènt par la liberasiòṅ dal fémni, ch'i gh dàn'n adòs, l'è na trapla. Che lōr i al vōlan tiràr śò nûd, par furtùna che la Paola la s pintìs in tèmp ciamànd la pulisìa. Purtròp un difèt la gh 'l à anc lē, dū cajunsèṅ in mèś a 'l gambi, ma la vōl listés avér un putèṅ da lò. Al dutōr (Gino Pagnani) al diś a Fiore ch'in Śvisra i prévan tajàr via incòsa ma i gh vōlan di bèsi. Michele al decìd ad fargàr-i a la màdar superiōra (Adriana Facchetti) ch'la tîṅ adrē a sò pàdar (Renato Pinciroli) a 'l ricòvar. Al fà giùst in tèmp a dar-i a la Paola che la pulisìa la 'l bèca miténd-'l in parśòṅ. Quànd al tórna a al gh cata la Paola cun na vóś da Paolo. In clìnica i gh'ìvan dit ch'a n gh'éra gnint da far, a n sa psiva cavàr via gnint, piutòst śuntàr quèl, un quèl ch'a Michele a n gh piàś gnanc un pôc ma a la Rosaria sè, a s véd da la pansa ch'a gh'è vgnuda cum a gh piàś a la raśdóra!

Culegamènt estéran