C'l artìcul chè 'l è scrit in Miranduléś Emiliàn

Un bòṅ p'r i past


Al bòṅ p'r i past (in itagliàṅ Buono pasto) 'l è un mèś ad pagamènt cun un valōr bèla determinâ ch'al pōl èsar druâ par cumpràr un past o dal magnàr. Ad sòlit 'l è fat ad carta ma dal vòlti 'l è na tèsra cun un microchip ad dèntar.

I èṅ druâ da i dipendènt pùblic e da qvéi privâ a 'l pòst dal servìsi in ménsa dirèt. Chi bòṅ chè i pōl'n èsar spéś sōl in di esercìsi cunvensiunâ pùblic (bar, risturànt, etc...) e i èṅ cgnusû anc c'n al nóm ingléś ad ticket.

In Itâglia a gh'è na léǵ ch'la i règla, al D.P.C.M. dal 18 ad Nuvémbar dal 2005 ("Afidamènt e gestiòṅ di servìsi sustitutìṿ dla ménsa"), publicâ in sla Gaśéta Uficiàla dal 17 ad Śnar dal 2006. Na senténsa dal TAR dal Lasi 'l à pò scanślâ soquànti sò parti.

In fiṅ a rivàr a 'l impòrt ad 5,29 euro par bòṅ, al n gh'à minga dal tasi insìma e al cóst dal servìsi al s pōl dascargàr acsè cuma l'IVA ch'la s paga a 'l 4% p'r i dipendènt e a 'l 10% par chi àtar lavuradōr, culaburadōr estéran e lìbar prufesiunìsta. Sōl p'r i dipendènt pùblic a gh'è na léǵ, la 135 dal 7 'd Agóst dal 2012, ch'la diś che par lōr un bòṅ p'r i past al n gh'à mia da èsar ad sōvar di sèt euro ad valōr, anc arbasànd-al se prima 'l éra più élt.

I bòṅ p'r i past i n s pōlan briśa muciàr sù, scambiàr cun di bèsi (gnanc p'r avér al rèst indrē) o dar via a di àtar.

I negusiànt i arcgnósan al valōr numinàl a i cliènt ma pò i ciàp'n indrē sōl un valōr scuntâ, in baś a qvél ch'a gh'è scrit insìma a la cunvensiòṅ che lōr i aṅ firmâ cun la dita ch'la i distribuìs.