American beauty
|
C'l artìcul chè 'l è scrit in
Miranduléś |
 American beauty
| ||
| American beauty | ||
 La Suvari e Kevin Spacey in na figùra dal film | ||
| Belésa americàna 1999 | ||
|---|---|---|
| Regìa: Sam Mendes | ||
| Scritōr: Alan Ball | ||
| Atōr: Kevin Spacey • Mena Suvari • Wes Bentley Annette Bening • Thora Birch • Peter Gallagher Chris Cooper • Allison Janney • Scott Bakula Sam Robards • Barry Del Sherman • Ara Celi | ||
| Müsica: Thomas Newman | ||
| Léngua: Ingléś | ||
| Dürä dal film: 117 minüt | ||
| Nasiōṅ: Stat Unî | ||
American beauty (Belésa americàna) 'l è 'n film dramàtic americàṅ dal 1999 ad Sam Mendes vinsidōr ad sinc Prèmi Òscar, ad tri Golden Globe e ad siē Prèmi Bafta dal 2000.
Al gh'à abû anc un sucès cumerciàł dimóndi grôs avénd muciâ sù da piò ad tarśènt-sinquantasiē migliòṅ ad dòlar c'n un budget ad sōi quìndas migliòṅ.
Sunt
Lester Burnham (Kevin Spacey) al gh'à quarànta-dū an e al n s cumpatìs briśa al sò lavōr, qvél ad scritōr p'r un periòdic, cun qvi là ch'i 'l vōl'n anc lasàr a cà. Sò mujér Carolyn (Annette Bening) la fà l'agìnta ch'la vénd dal cà e l'è dimóndi ambisióśa e la pénsa sōl a la sò caréra. I dū i gh'àn'n anc na fiōla ad séd'ś an, la Jane (Thora Birch) ch'la gh 'n à abàsta di sò genitōr. I vśèṅ ad cà nóṿ i èṅ al culunèl di Marines in pensiòṅ Frank Fitts (Chris Cooper), sò mujér Barbara (Allison Janney) e al sò ragàs Ricky (Wes Bentley), òṅ ch'al tōś par lò e al dà anc via dla marijuana sénsa che sò pàdar, dimóndi autoritàri, al sàppia quèl. Ricky al s divertìs anc a tiràr śò la gint cun la sò videocàmra.
Durànt 'l intervàl dna partìda ad basket, Lester al véd in sal camp la cheerleader Angela Hayes (Mena Suvari), n'amìga ad sò fiōla, e cla ragasōla lè la dvènta la sò usesiòṅ. 'L óm, ch'l à sèmpar cunsiderâ la pugnéta sóta la dócia a la matìna al mumènt più impurtànt di sò dè, al taca a insuniàr-'s-la a la nòt, cun lē ch'l'è quaciàda da di pètai ad ròśi rósi. In cal méntar sò mujér la gh fà i còran cun Buddy Kane (Peter Gallagher), 'n óm 'd afâr anca lò.
Lester, pinsànd a la sò dōlsa Angela e al paròli ch'l'à dit lē, che lò al n sarév gnanc da butàr via se sōl al fus un cinèṅ più in fórma, al taca a far-'s i mùscui cun di pēś. Al dvènta anc amìg ad Ricky. Quànd pò al s cata da par lò in cà cun l’Angela, chi lē la gh diś ch'la 'l cata sèxy ma a n sucéd gnint parchè lē l'è incóra vìrgin. Al culunèl, in cal méntar, cardénd ch'al sò vśèṅ al faga dal purcàdi cun sò fiōl, al tōś in maṅ al sćiòp.