Elesiòṅ pulìtichi itagliàni dal 2013: differenze tra le versioni
Creata pagina con '{{Metacaixa |id=0 |color= |bt1=Miranduléś |bticona1=16px |ps1= __NOTOC__ {{dialort | dial=Miranduléś}} File:Silvio Berlusconi in Saint Pe...' |
(Nessuna differenza)
|
Versione delle 02:29, 9 feb 2013
C'l artìcul chè 'l è scrit in Miranduléś |
Gl’Elesiòṅ pulìtichi itagliàni dal 2013 par la Cambra e 'l Senàt dla Repùblica i gh saràṅ Dméndga 24 e Lunadè 25 Favràr 2013 dòp al dasfacimènt dal cambri dal 22 ad Dicémbar dal 2012, quàtar méś prima dla scadénsa dla XVI Ligiśladùra. La léǵ ch'a s druarà par determinàr i deputâ e i senadōr elèt l'è la Léǵ Calderoli, cgnusùda anc cuma Porcellum (Léǵ Pursèl).
Gl'eletōr a la cambra i saràṅ 51 migliòṅ. I sìmbui ad partî tgnû bòṅ i èṅ 184 in tut.
La circuscrisiòṅ XI dla Cambra, qvéla dl'Emìglia-Rumàgna, l'è la più granda 'd Itâglia (insém a la IV dla Lumbardìa II) parchè la purtarà a Róma 45 deputâ. P'r al Senàt a la regiòṅ i gh spèt'n invéci 22 sedadōr, 13 garantî par la cualisiòṅ ch'la vins.
Fra i leader ad cualisiòṅ, candidâ a dvintàr presidènt dal cunsìli, a gh'è al piacintèṅ ad Bétla Pier Luigi Bersani (p'r Itàglia. Bèṅ Cumùṅ). I gh'èṅ anc tri leader ad partî emigliàṅ in camp, i bulgnéś Pier Ferdinando Casini (Ugnòṅ ad Sèntar) e al presidènt dla Cambra Gianfranco Fini (Futùr e Libertà), ch'i daṅ al lōr apòǵ a la cualisiòṅ ad sèntar ad Mario Monti, Sièlta Cìvica - Insém a Monti par l'Itàglia, e al banchēr mudnéś ad Muntéś Gianpiero Samorì (Muderâ Itagliàṅ in Rivulusiòṅ), da la banda ad Silvio Berlusconi.
Cualisiòṅ in camp
- Itàglia. Bèṅ Cumùṅ (Italia. Bene Comune) ad Pier Luigi Bersani - Cualisiòṅ ch'la mét insém al sò Partî Demucràtic cun Sinìstra Eculugìa Libertà dal presidènt dla regiòṅ dla Puglia Nichi Vendola, al Partî Sucialìsta ad Riccardo Nencini e al Sèntar Demucràtic ad Bruno Tabacci. Qvést chè al s éra preśentâ a 'l primàri ad cualisiòṅ dal 25 ad Nuvémbar dal 2012 insém a Matteo Renzi (sìndic ad Firénse) e Laura Puppato dal PD, pardénd in di cunfrònt ad Bersani;
- Sèntar Dèstra (Centro Destra) ad Silvio Berlusconi - Cualisiòṅ ch'la mét insém al sò Pòpul dla Libertà cun la Léga Nòrd ad Roberto Maroni (ex minìstar d'l Intéran e candidâ a dvintar al presidènt dla regiòṅ Lumbardìa), Fradèi 'd Itàglia 'd Ignazio La Russa, Giorgia Meloni e Guido Crosetto, La Dèstra ad Francesco Storace (ex minìstar dla salùt e candidâ a dvintar al presidènt dla regiòṅ dal Lasi), Sud Grand ad Gianfranco Miccichè e Adriana Poli Bortone, al Partî di Pensiunâ ad Carlo Fatuzzo, Muderâ Itagliàṅ in Rivulusiòṅ ad Gianpiero Samorì e àt'r incóra;
- Sièlta Cìvica - Insém a Monti par l'Itàglia (Scelta Civica - Con Monti per l'Italia) ad Mario Monti - Insém a lò i gh'èṅ anc l'Ugnòṅ ad Sèntar ad Pier Ferdinando Casini e Futùr e Libertà ad Gianfranco Fini;
Partî ch'i vaṅ da par lōr
- Muimènt Sinc Stéli (MoVimento Cinque Stelle) ad Beppe Grillo - Muimènt ch'al pòrta avànti la demucrasìa dirèta e al gh'à sinc téma sentrài in tèsta: àqua pùblica, traspòrt, śvilùp, cunét'r-as insém e ambiènt. 'L à sarnî i sò candidâ via web, cun di elesiòṅ tgnudi da 'l 3 a 'l 6 ad Dicémbar dal 2012;
- Rivulusiòṅ Civìla (Rivoluzione Civile) 'd Antonio Ingroia - Partî ch'al mét insém gl'ex magistrâ Antonio Ingroia, Antonio Di Pietro (leader dal partî Itàglia di Valōr) e Luigi De Magistris, sìndic ad Nàpuli, cun i Vérd e soquànt Partî Cumunìsta. In lista a la Cambra in Emìglia-Rumàgna (pòst nùmar 2) a gh'è anc 'l ex cunsilēr regiunàl dal Muimènt Sinc Stéli, elèt a Mòdna, Giovanni Favia, casâ via al 12 ad Dicémbar da 'l sò vèć partî par Beppe Grillo in parsòna;
- Far par Farmàr al Declîṅ (Fare per Fermare il Declino) 'd Oscar Giannino - Muimènt liberàl nâ da 'l impégn ad soquànt ecunumìsta cuma Luigi Zingales e Michele Boldrin e da 'l giurnalìsta turinéś Oscar Giannino;
- Amnistìa Giustìsia e Libertà (Amnistia Giustizia e Libertà) ad Marco Pannella - Schieramènt di Radicài ch'al vrév impgnàr-as par risòlvar i prubléma di carserâ e dla giustìsia;