Novecento: differenze tra le versioni
Contenuto cancellato Contenuto aggiunto
mNessun oggetto della modifica |
m linkadèina ùtil |
||
Riga 38:
In dal dè dla mòrt ad [[Giuseppe Verdi]] (27 ad Śnar dal 1901), in dal pudēr dal vèć padròṅ ''Berlinghieri'' ([[Burt Lancaster]]) ch'al gh'à in dal Parmśàṅ, i nàsan al sò anvō ''Alfredo'' ([[Paolo Pavesi]] e [[Robert De Niro]]), ch'al pòrta al nóm cumpàgn dal suo, e ''Olmo Dalcò'' ([[Roberto Maccanti]] e [[Gérard Depardieu]]), fiōl dla ''Rosina'' ([[Maria Monti]]), na cuntadìna ch'la lavóra in dla sò tèra e ch'la 'l à abû da 'n óm ch'a n s sà briśa ch'i 'l sia. Al pàdar dal pìcul ''Alfredo'', ''Giovanni'' ([[Romolo Valli]]) al vōl tōr lò incòsa quànd sò pàdar al murirà, lasànd al briśi a 'l sò fradèl più grand ''Ottavio'' ([[Werner Bruhns]]). Al nunòṅ ''Berlinghieri'' al gh'à na surèla, ''Desolata'' ([[Francesca Bertini]]), ch'la fà la sōra e l'è gnuda a star da lò parchè la s è róta ad vìvar in cunvènt.
Da baghét ''Olmo'', cun al sò caràtar arvèrs e sèmpar prònt a dir dal [[parulàsa|parulàsi]], al dvénta amìg 'd ''Alfredo'' anc se chi lò al fà part dla famìja di padròṅ. Qvést chè pò al gh'à anc un bèl rapòrt cun sò nunòṅ, ch'al gh inséggna a druàr al sćiòp, e minga tant cun sò pàdar ch'al pénsa sōl a i bèsi. Un dè al vèć ''Berlinghieri'' al decìd ad tōr-'s la vita, impicànd-as in na stala cun dal cadéni in mèś a 'l sò vachi, quànd vilî al s rénd cònt 'd n èsar più bòṅ a far quél ch'al fava na vòlta: al fà fadìga a giràr, a dar di órdan a i sò cuntadèṅ, a tgnir-'s in a mènt al ròbi e p'r avér al [[Mâł dla lumàga|mâl dal lumàghi]] adòs. ''Giovanni'' al s in prufìta faghénd butàr śò lè par lè un testamènt a 'l nudàr ch'al gh lasa incòsa a lò e sōl un vitalìsi ad 5.000 franc a 'l méś a sò fradèl.
Quànd a vèṅ na timpèsta ch'la s pòrta via mità dal [[Furmintòun|furmintòṅ]], ''Giovanni'' al fà savér a i sò cuntadèṅ ch'a gh darà mità dal stipéndi. Òṅ 'd qui lè, dit „Al muntanàr“, par prutèsta al s taja via n'urécia. In séguit i lavuradōr i tàcan a tgnir a drē a ''La Lega'', n'urganiśasiòṅ sindacàla ch'la difénd i sò dirìt, e i daṅ vita a 'n siòpar ch'al mét in śnòć i camp méntar ninsòṅ al munś al [[Vaca|vachi]] e i padròṅ i èṅ custrét a 'ndàr a tōr al lat in sità e pò a pagàr di crumìr e andàr anca lōr a lauràr la tèra. A stanta-tri an ''Leo Dalcò'' ([[Sterling Hayden]]), al nunòṅ 'd ''Olmo'', al gh la cava a védar un padròṅ lauràr ma 'l è 'l ùltim quèl ch'al pasa p'r i sò òć parchè al mōr mént'r al pònsa sóta 'n [[àrbul]].
| |||