Southland Tales - Così finisce il mondo
|
C'l artìcul chè 'l è scrit in
Miranduléś |
 Southland Tales
| ||
| Southland Tales - Così finisce il mondo | ||
 Dwayne Johnson in na figùra dal film | ||
| Stòri da 'l Meridiòṅ - Al mónd al finìs acsè 2006 | ||
|---|---|---|
| Regìa: Richard Kelly | ||
| Scritōr: Richard Kelly | ||
| Atōr: Dwayne Johnson • Seann William Scott Sarah Michelle Gellar • Curtis Armstrong Kevin Smith • Mandy Moore • Justin Timberlake Christopher Lambert • Jon Lovitz • Amy Poehler | ||
| Müsica: Moby | ||
| Léngua: Ingléś | ||
| Dürä dal film: 194 minüt | ||
| Nasiōṅ: Stat Unî • Germàgna • Frància | ||
Southland Tales - Così finisce il mondo (Stòri da 'l Meridiòṅ - Al mónd al finìs acsè) 'l è 'n film americàṅ dal 2006 ad Richard Kelly, al regìsta ad Donnie Darko, ch'al 'l à anc scrit. La pelìcula, ambintàda in un preśènt alternatìṿ, la mìsć' insém soquànt gènar cinematugràfic cuma 'l còmig, al dramàtic, al pulisiésc, al musical e 'l fantasientìfic.
Al film 'l è stâ preśentâ in dal Maǵ dal 2006 a 'l 59śum Fèstival ad Cannes in dua però al n è minga tant piaśû tant ch'l è stâ fat sù 'd nóṿ vgnénd pò fóra in dal sali sōl in dal Setémbar dal 2007. P'r al fat ch'al n è gnanc stâ bòṅ ad far sù quatarsènt-mila dòlar, dòp ès'r-an custâ darsèt migliòṅ, a s pōl dar ch'al n sia piaśû gnanc a 'l pùblic.
Sunt
In dal 2008 Boxer Santaros (Dwayne Johnson), atōr famóś ad film 'd asiòṅ, al vîṅ catâ sénsa memòria in dal dèśèrt da Fortunio Balducci (Will Sasso), śugadōr 'd aśard e spaciadōr ad dròga. Chi lò 'l al pòrta sèg a Los Angeles faghénd-ag crédar 'd ès'r un sò amìg cumpàgn a la èx atōra pòran Krysta Kapowski (Sarah Michelle Gellar) che però la s fà ciamàr Krysta Adès parchè sérti purcàdi a gh'è da far-i subìt.
Dòp 'n atàc nucleàr in Tèxas, al guèr'n al s rénd cònt che par purtàr avànti na lòta a 'l terurìśum cum a s dév al gh'à prima da métar sóta cuntròl tut al teritòri dal paéś druànd na réda 'd spiunàǵ ciamàda „USIdent“, cuntrulàda par la Nana Mae Frost (Miranda Richardson), mujér dal candidâ republicàṅ a la vice-presidénsa di Stat Unî, al senadōr Bobby Frost (Holmes Osborne). Cónt'r ad lōr a s mét un grup ad nèo-marxìsta.