Pèpa (śōg)

 Miranduléś

C'l artìcul chè 'l è scrit in Miranduléś

Ninsòṅ a vōl la Puta

La pèpa (Peppa in itagliàṅ, cgnusû a 'l èstar cuma Hearts in di Stat Unî e Chat Noir in Frància) 'l è 'n śōg ad carti, cun soquànti variànti, ch'a s fà in quàtar druànd un mas ad carti francéśi (sinquànta-dū carti sénsa 'l mati).

Règhli

Al masēr al méśda 'l carti e al in dà tréd'ś a tut, pò tut i śugadōr i 'n sarnìsan tri da pasàr quaciàdi a 'n sò aversàri, tacànd da qvél ad dèstra, par pasàr a qvél ad sinìstra e pò a qvél davànti a lò (in dal partìdi a vgnir).

A taca la maṅ chi gh'à 'l dū 'd fiōr esénd che cla carta chè l'è qvéla ch'la gh'à da èsar śugàda par prima, pò a s và in sèns uràri e tut chi àtar śugadōr i gh'aṅ da rispónd'r a fiōr, calànd na carta ad cal sém chè. S'in dla prima maṅ un śugadōr al n gh'à minga di fiōr, al pōl śugàr un quàdar o 'n pic a piaśēr ma mai la dóna 'd pic, ciamàda Pèpa o anc Puta. Sōl s'in maṅ a s gh'à sōl dal carti 'd cōr a s pōl śugàr-'n una 'd qvili lè. La maṅ la finìs a chi à śugâ 'l fiōr più élt, tgnénd a mènt che 'l as al cmanda su 'l rè.

Al carti ch'i dànan di punt negatìṿ

Da la secónda maṅ in avànti a taca sèmpar al śugadōr ch'l à purtâ a cà la maṅ ch'l'è péna finìda. Chi lò al pōl śugàr na carta a piaśēr, anc la Pèpa, ma i cōr i pōlan èsar scartâ sōl s'i èṅ bèla stâ “scavśâ” ch'a vōl dir che qualchidòṅ in dal maṅ vèci al s 'n è bela bcâ almànc òṅ ad travèrs, un quèl ch'a pōl sucédar sōl quànd un śugadōr al n gh'à minga na carta dal sém cumpàgn par rispóndar a qvél dla prima calàda. Quànd però al śugadōr ad tùran al gh'à in maṅ sōl di cōr al gh'à par fòrsa da śugàr un cōr anc s'i n èṅ minga incóra stâ “scavśâ”. A gh'è sèmpar 'l òblig ad rispónd'r a 'l sém śugâ a 'l inìsi e, sōl s'l è impusìbil far-al, a s pōl śugàr na carta a piaśēr, anc un cōr o la Pèpa. A ciàpa la maṅ sèmp'r al śugadōr ch'l à scartâ la carta più élta dal sém śugâ a 'l insìsi (dònca s'a s śōga na carta ad travèrs a n s pōl mai ciapàr la maṅ).

Quànd i èṅ finìdi tut al carti i s cònt'n i punt ch'i s èṅ muciâ durànt tut al maṅ. I punt i èṅ sèmpar negatìṿ in cal śōg chè, cun la Pèpa ch'la vâl trédas punt sōl lē mént'r i cōr un punt a carta, p'r un tutàl ad vint-siē punt a partìda. S'un śugadōr 'l à muciâ tut i punt lò (trédas cōr più la Pèpa) a sucéd ch'al li fà patìr a tut chi àtar, vint-siē punt a crani mént'r invéci lò al n paga gnint.

Quànd un śugadōr al pasa i sènt punt a finìs al śōg e chi gh'à méno punt al vins.