C'l artìcul chè 'l è scrit in Miranduléś Emiliàn


La Panarello tòlta śò in dal 2006


La Melissa Panarello (Catàgna, 3 ad Dicémbar dal 1985) l'è na scritōra, sagìsta e persunàǵ televiśìṿ itagliàṅ. Al sò prim rumànś, 100 colpi di spazzola prima di andare a dormire, 'l à vindû da piò ad tri migliòṅ ad còpi.

Biugrafìa

Nada a Catàgna in dua l'à anc fat al lìceo clàsic Mario Cutelli, la Melissa la crés pò a Aci Castèl. In dal 2003, a darsèt an, la scriv al sò prim lìbar, al rumànś eròtic e malnét autobiugràfic 100 colpi di spazzola prima di andare a dormire (Sènt cōlp ad spaséta prima 'd andàr a durmìr) ch'al vénd dimóndi e ch'a vèṅ distribuî in 42 paéś in dal mónd. Dū an dòp al regìsta Luca Guadagnino al gh fà 'n film, Melissa P., pròpria méntar lē la fà vgnir fóra la sò secónda òpra, L'odore del tuo respiro.

In d'l Avrìl 2006 la scriv In nome dell'amore, na sòrta 'd létra vèrta a 'l cardinàł Camillo Ruini (in alóra presidènt dla CEI) ch'la denùnsia 'l fat ch'la Céśa Catòlica la mét da spés al bèc in di fat pulìtic dl'Itàglia. In dal 2010 l'è la vòlta ad Tre, al sò prim lìbar par la Giulio Einaudi Editore.

In séguit la tōś part a dal traśmisiòṅ televiśìvi cuma Mistero o Victor Victoria insém a la Victoria Cabello, a la cantànta Arisa e la còmica Geppi Cucciari e la tîṅ na rubrìca 'd astrulugìa su Grazia e di atri p'r i giurnài e setimanài Sette, Max, Gli Altri, Il Fatto Quotidiano e Il Giornale.

In dal 2011 la pùblica 'l sò sèst lavōr, In Italia si chiama amore, ch'al trata 'l argumènt dal sès e dgl'itagliàṅ. In dal 2013 'l è la vòlta dal sò quàrt rumànś, La Bugiarda con Fandango.