C'l artìcul chè 'l è scrit in Miranduléś Emiliàn

Un mas ad carti da brìscula ad Piacénsa


Mèrda 'l è 'n śōg ad carti itagliàṅ ch'a s fà c'n un mas ad carti da brìscula. 'L è cgnusû anc c'n i nóm ad Tap, Àśan e Pòrc e al preśénta soquànti variànti e difarénsi.

A s pōl śugàr da tri parsòni in sù.

Règhli

Tant par tacàr a gh'è da tiràr via da 'l mas di grup ad quàtar carti cumpàgni (as, rè, cavài, fant e via dascurénd) a secónda dal nùm'r ad śugadōr (cun quàtar cuncurènt a s gh'arà dònca dódas carti) mént'r al rèst dal mas al và misćiâ e mis a 'l sèntar dal tàvul.

Al masēr, ch'al càmbia a tùran a la fiṅ dna partìda, al méśda gl'atri carti e al in dà quàt'r a tut. A cal punt chè al cuncurènt a la sò sinìstra al taca 'l śōg ch'al cunsìst in d'l avēr in maṅ un poker, cumbinasiòṅ ch'la fà srar la partìda. S'al gh 'l à bèṅ o sinò al gh'à da pasàr na carta, quaciàda, a 'l sugadōr ch'a gh'è dòp andànd in sèns uràri. Se qvést chè al gh'à 'l poker a sém a pòst, in caś cuntràri anc chi lò al gh'à da scartàr na carta a 'l śugadōr ch'a vîṅ dòp.

Quànd qualchidòṅ al fà poker al gh'à da dir „chilo 'd mèrda“ e métar la maṅ in sal mas a 'l sèntar. Tut chi àtar cuncurènt i gh'aṅ da far àtar tant piciànd la maṅ dal vinsidōr o 'd 'n àtar cuncurènt ch'l è stâ più śvélt ad lò. 'L ùltim ch'a riva, o 'l cuncurènt ch'al gh'is da piciàr al mas prima dal vinsidōr, al pèrd la partìda e 'l gh'à da cagàr di chilo 'd mèrda ch'i èṅ qvéi scrit su la prima carta dal mas ch'la và dasquaciàda e tòlta via.

Chi 'n fà da piò al pèrd

Quànd tut al carti dal mas a 'l sènt'r i èṅ finìdi, i s cònt'n i chilo 'd pét cagâ da tut i śugadōr e qvél ch'al 'n à fat ad méno al vins. Durànt al śōg a s pōl anc far al fùrub, sigàr „chilo 'd mèrda“ e pò far finta 'd piciàr al mas. Se qualchidòṅ al gh casca, al prim ch'al mét la maṅ su 'l mas, al caga i chilo dla carta ch'l à tucâ e pò a s cuntìnua la partìda in cōrs.

Fra 'l variànti a cal śōg chè a gh'è qvéla 'd batśàr na carta dal mas ch'la parmét a 'n śugadōr ad „tiràr l'àqua“ e dònca 'd far sparìr tuta la mèrda ch'l à cagâ in fiṅ a lè o qvéla 'd pasàr la carta scartàda tut insém invéci che tgnir adrē a 'l tùran (c'n al prim ch'l armàgn sèmpar cun tri carti in fiṅ tant che 'l śugadōr a la sò dèstra al gh in pasa una).