Luca Carboni

C'l artìcul chè 'l è scrit in Miranduléś

«

Ma guarda là, che cazzo fa, ma pensa te, ma come guida quel deficiente, poi guarda qua, che ora è già, ma chi ti ha dato la patente, che ti scoppiasse un dente, a te... Siamo sempre di corsa, sempre in agitazione, anche te che anche se lecchi il gelato hai lo sguardo incazzato.»

(IT)(La mia città, 1992)

«

Ma guàrda là, cuśa cas fà'l? Mo pénsa tè, ma cuma guìda'l cal deficènt, pò guàrda chè, che ór'a s è fat, ma chi è'l ch't à dâ la patènt? Ch'a t sćiupìs un dènt, a tè... A sém sèmp'r ad présia, sèmp'r in agitasiòṅ, anca tè ch'anc s'at léc al ślâ at gh'à sèmpar 'l òć incasâ.»

(MUD)

Luca Carboni (Bulògna, 12 'd Utóbar dal 1962) 'l è 'n cantànt itagliàṅ ch'al scriv anc al sò canti. 'L à tacâ a sunàr in dal 1981 cuma chitarìsta dal grup Teobaldi Rock e pò cuma cantànt da par lò in dal 1984.

Biugrafìa

Luca Carboni 'l è al quàrt fiōl ad sinc (tri masć e dū fémni). Sò pàdar al lavóra in na dita ch'la fà dal carusìni e śugàtui par putèṅ méntar sò màdar l'è na raśdóra. Dòp avér imparâ da pìcul a sunàr al pianufòrt, in dal 1976 al mét in pē al grup di Teobaldi Rock. In dal 1982 al scriv la canta Navigando controvento p'r i Stadio.

In dal Śnar dal 1984 al fà gnir fóra al sò prim disc ...intanto Dustin Hoffman non sbaglia un film ch'al vénd 30.000 còpi. A gh và méj 'l an dòp cun al sò secónd àlbum Forever ch'al riva a 70.000 cun al sìngul sarnî Sarà un uomo. Ma al sucès par lò al riva dabòṅ cun al disc dal 1987 Luca Carboni. Cuciâ in élt da 'l canti Silvia lo sai e Farfallina, cal lavōr chè al in vénd 700.000 còpi e 'l armàgn a 'l prim pòst dal clasìfichi par dimóndi tèmp. Anc al disc dòp Persone silenziose (gnû fóra al 24 ad Nuvémbar dal 1989) al vénd bèṅ: 500.000 còpi.

I an Nuànta i s vèran par lò cun 'n àtar sucès da 'n migliòṅ ad còpi, Carboni (1992), cun dèntar di braṅ dimóndi famōś cuma Ci vuole un fisico bestiale, Mare mare, tradót anc in Grèc, La mia città e Le storie d'amore. Àtar disc 'd in alóra i èṅ MONDO world welt monde (1995) e Carovana (1998).

Discugrafìa

Àlbum

1984 - ...Intanto Dustin Hoffman non sbaglia un film
1985 - Forever
1987 - Luca Carboni
1989 - Persone silenziose
1992 - Carboni
1995 - MONDO world welt monde
1998 - Carovana
2001 - LU*CA
2006 - ...Le band si sciolgono
2009 - Musiche ribelli cover
2011 - Senza titolo

Racòlti

1993 - Diario Carboni
1999 - Il tempo dell'amore
2007 - Una rosa per te

Da'l Viṿ

2003 - Live

Culegamènt Estéran

(IT) Al sò sit ufisiàł