Liliana Segre
|
C'l artìcul chè 'l è scrit in
Miranduléś |
La Liliana Segre (Milàṅ, 10 ad Setémbar dal 1930) l'è n'ebrèja itagliàna scampàda a i camp ad stermìni naśìsta.
In dal 1944, quànd la gh'iva sōl tréd'ś an, l'è finìda a Auschwitz dòp avēr pruâ a scapàr via in Śvisra cun sò pàdar (pò masâ da i naśìsta acsè cuma i sò nunòṅ) e dū sò cuśèṅ. I tedésc i gh'aṅ tatuâ al nùmar 75190 su 'l bras. La Segre l'è stada pò liberàda in dal Maǵ dal 1945.
Par la sò testimuniànsa su 'l Ulucàust, ch'l'à decìś ad dar da 'l inìsi di an Nuànta in dal scōli e in di cunvégn in gir par l'Itàglia, al 19 ad Śnar dal 2018 al presidènt dla Repùblica Sergio Mattarella al l'à numinàda senadōra a vita.
La gh'à dū làurei honoris causa, la prima in “Giurisprudénsa” ch'la gh'à dâ l'Università 'd Trièste in dal 2008, la secónda in “Siénsi pedagògichi” ch'la gh'à śibî l'Università 'd Veróna.