Munumènt a Èrcule e Antèo

(Reindirizzamento da I du brasè)

C'l artìcul chè 'l è scrit in Miranduléś Emiliàn

Còpia dla statṿa fóra da 'l palàs cumunàł


Al munumènt a Èrcule e Antèo, cgnusû anc cuma „I du brasè“ in dialét pramśàṅ parchè i dū prutagunìsta i pàran ch'i siàn drē a brasàr-as, 'l è 'n munumènt in ram dal XVII sécul ch'al s cata a 'l sèntar dal curtìl dal Palàs Cuśàni a Parma, in dla sēd dla Cà dla Mùśica[1].

'L è stâ fat da 'l 1684 a 'l 1687 da 'l scultōr fiamìng Teodoro Vanderstruck e na sò còpia 'l è stada misa anc in na nìcia fóra da 'l palàs cumunàł.

La statṿa di dū brasâ

L'òpra la véd Èrcule tiràr sù cun la fòrsa al gigànt Antèo par pò stricàr-'l a mòrt esénd ch'al fiōl ad Puśeidòṅ e dla Gea al muciàva tuta la sò fòrsa armagnénd c'n i pē a cuntàt cun la Tèra, sò màdar.

Stòria

Al munumènt a Èrcule e Antèo, da métar pò in dla funtàna davànti a 'l Palàs dal Giardèṅ, 'l è stâ fat far a 'l artìsta Teodoro Vanderstruck p'r al duca 'd Parma Ranùć II Farnéś ch'al vliva festegiàr acsè al matrimòni ad sò fiōl Duàrd II Farnéś, ch'al gh sarév stâ in dal 1690.

In séguit la statṿa l'è stada spustàda dimóndi vòlti in fin tant ch'l'è stada misa in na nìcia dal palàs dal Cumùṅ su órdan dal pudestà Lucio Bolla in dal 1825.

In dal 1829 al marmìsta Vincenzo Galli, su diségn d'l architét e inciśōr Paolo Toschi, al gh'à fat na funtàna nóva par métar-'g-la dèntar. Al prim ad Śnar dal 1981 di vàndai sénsa critèri i aṅ scavśâ 'l bras dèstar 'd Antèo cavànd-'g-al via. 'L art al n è mai stâ catâ tant ch'in dal 1985 al cumùṅ al 'n à fat far òṅ 'nóṿ a la scultōra pramśàna Jucci Ugolotti ch'la 'l à giustâ e restaurâ in dal 1994.

Nòti