Hot Chick - Una bionda esplosiva
|
C'l artìcul chè 'l è scrit in
Miranduléś |
 The Hot Chick
| ||
| Hot Chick - Una bionda esplosiva | ||
 La Sam Doumit in na figùra dal film | ||
| Pulàstra bujènta - Na biónda ch'la scòpia 2002 | ||
|---|---|---|
| Regìa: Tom Brady | ||
| Scritōr: Tom Brady • Rob Schneider | ||
| Atōr: Rob Schneider • Anna Faris • Robert Davi Matthew Lawrence • Eric Christian Olsen Melora Hardin • Rachel McAdams • Maritza Murray | ||
| Müsica: John Debney | ||
| Léngua: Ingléś | ||
| Dürä dal film: 104 minüt | ||
| Nasiōṅ: Stat Unî | ||
Hot Chick - Una bionda esplosiva (Pulàstra bujènta - Na biónda ch'la scòpia) l'è na cumèdia americàna dal 2002 ad Tom Brady ch'al l'à anc scrita insém a 'l atōr prutagunìsta Rob Schneider. In un camèo i s véd'n anc Adam Sandler e 'l cantànti Ashlee Simpson, Angie Stone e Michelle Branch.
Cl'òpra chè l'è custàda trénta-quàtar migliòṅ ad dòlar e la 'n à pò muciâ sù da piò ad sinquànta-quàtar.
Sunt
La Jessica Spencer (Rachel McAdams) l'è na ragàsa biónda 'd un culéǵ califurgnàṅ ch'la fà la cheerleader insém a 'l sò amìghi Keecia (Maritza Murray), Lulu (Alexandra Holden) e April (Anna Faris). Chi lē, ch'la daśvîṅ da 'l Arkànsas, l'è la sò amìga dal cōr fiṅ da quànd a scōla tut i la tulìv'n in gir par via dal sò asènt dixie dimóndi pēś. Un dascōrs a part invéci al và fat par la Bianca (Maria-Elena Laas), na śōvna dna banda rivàl, par cla budlòna dla Hildenburg (Megan Kuhlmann), che lē la gh fà far na figùra 'd mèrda durànt na partìda 'd basket, e par l’Eden (Sam Doumit), na wicca ch'la s è daśgustàda sèg.
Durànt un gir in un sèntar cumersiàł la Jessica la fà a mènt a 'n para 'd buclèṅ luśènt ch'i gh piàśan dimóndi in un negòsi 'd ròba africàna dla Madame Mambuza (Angie Stone). P'r al fat ch'i n èṅ minga in véndida, la ragàsa la decìd ad fargàr-i par métar-'s-i adòs durànt al bal 'd fiṅ d'l an. Chi urcèṅ lè, ch'i éran dla prinsipésa abisìna Nawa (Shazia Ali) in dal 50 P.C., i èṅ bòṅ ad scambiàr al mènt fra dū còrp e 'l è qvél ch'a sucéd dabòṅ fra lē e 'n delinquènt ciamâ Clive Maxtone (Rob Schneider) ch'al 'n iva catâ sù òṅ da par tèra durànt na rubarìa. Par la Jessica 'l è 'n brut cōlp, la n s cumpatìs minga tut chi pēi ch'la gh'à adòs ma in tut al manéri la cuntìnua a cumpurtàr-as da figa.