Wikipedia

Freddie Mercury

C'l artìcul chè 'l è scrit in Miranduléś Emiliàn

Freddie Mercury tòlt śò in dal 1977


«
Sometimes I feel I'm gonna break down and cry (so lonely), nowhere to go, nothing to do with my time, I get lonely so lonely living on my own.»
(EN)(Living On My Own, 1985)
«
Dal vòlti a m sènt ad tacàr a piànśar (tut da par mè), gnanc un pòst in du andàr, gnint da far in dal mè tèmp lìbar, a stag da par mè, acsè da par mè, vivénd par mè cònt.»
(MUD)


Freddie Mercury (Zanzibar, 5 ad Setémbar dal 1946 – Lóndra, 24 ad Nuvémbar dal 1991), nóm 'd art ad Farrokh Bulsara, 'l è 'n cantànt e cumpuśidōr Rock ingléś, leader dal grup di Queen.

Cuma cantànt 'l è cgnusû par la sò vóś dimóndi fòrta e par la sò manéra ad star in sal palc, dimóndi stravagànta. Cuma cumpuśidōr invéci 'l à scrit soquànt di pès più famóś dal grup cuma «Bohemian Rhapsody», «Killer Queen», «Somebody to Love», «Don't Stop Me Now», «Crazy Little Thing Called Love» e «We Are the Champions». In śunta a 'l sò impégn c'n i Queen, in di an Utànta 'l à dâ vita a na caréra da par lò faghénd dū àlbum in studi, Mr. Bad Guy dal 1985 e Barcelona dal 1988, qvést chè cun 'l ajùt dal suprâna spagnōla Montserrat Caballé. Al sìngul umònim 'l è stâ la canta uficiàla di Śōg Ulìmpic ad Barcelóna dal 1992.

Biugrafìa

Freddie Mercury durànt un cuncèrt a New Haven

Farrokh al nas a 'l uśdàl Shangani Govt. Hospital ad Śànśibar, in alóra pruteturâ britànic, adès part dla Tanśàgna, al 5 ad Setémbar dal 1946. I sò genitōr Bomi e Jer Bulsara, 'd etnìa parsi, i daśvgnìvan da Gujarat, un stat dl'Ìndia ucidentàla, e i ìvan spatinâ in Àfrica par lavōr. In dal 1952 a nas sò surèla Kashmira Cooke.

A òt an al taca a 'ndàr a la scóla St. Peter's Boys School, un culéǵ britànic a Panchgani davśèṅ a Bombay. 'L è chè ch'i al tàcan a ciamàr Freddy. Al baghét, brav in diségn e anc in di spòrt cuma 'l hockey in sal prâ, la córsa, al pugilâ e al tènis da tàvul, al taca a studiàr piàṅ, faghénd anc dal cover ad Cliff Richard e ad Little Richard in un grup ciamâ The Hectics mis in pē insém a àtar quàtar sò cumpàgn, prima ad cambiàr scóla pasànd a la St. Mary's School ad Bombay.

'L arìv in Inghiltèra

A darsèt an Freddy e la sò famìja i gh'aṅ da bandunàr Śànśibar par via dla rivulusiòṅ in at. I vàn'n a star a Feltham in Inghiltèra. Chè al s iscrìv a 'l pòlitècnic 'd Isleworth faghénd in cal mént'r anc di lavursèṅ p'r al servìsi dal magnàr 'd 'n aeropòrt e al magaśinēr in un sèntar cumerciàl. Dòp avér tòlt al diplòma, a Ealing al cgnós Tim Staffell, sò cumpàgn 'd università e cantànt e basìsta 'd al grup di Smile, banda ch'la vdiva in di sò rang anc al chitarìsta Brian May e al baterìsta Roger Taylor. Freddy al gh dmanda ad far part anc lò dal grp, cuma secónd cantànt, ma al n gh la cava briśa e alóra al s śònta invéci a 'n grup ad Liverpool, gl'Ibex, ma al gh rèsta pôc parchè al ròbi i vànan mâl e la banda l'è custrèta a dasfàr-as in dal 1970.

A séguit dal fiàsc dal prim sìngul di Smile, Earth/Step On Me, Staffell al mòla 'l grup e al fà acsè pòst a Freddy. Chi lò al sarnìs un nóm nóṿ p'r al grup, Queen (Regìna), e anc par lò, Freddie Mercury, in unōr dal dio Mercùri. Adès a gh'è sōl da catàr al basìsta giùst. A vèṅ sarnî John Deacon in dal 1971 e al grup al partìs par na série ad cuncèrt in Curnuvàglia. In cal méntar Freddy al cgnós la Mary Austin, na ragàsa ch'la viv'rà sèg par sèt an.

Discugrafìa

da par lò

  • Mr. Bad Guy (1985)
  • Barcelona (1988)

c'n i Queen

Estratto da "https://eml.wikipedia.org/w/index.php?title=Freddie_Mercury&oldid=134447"