C'l artìcul chè 'l è scrit in Miranduléś Emiliàn

Four Rooms
Four Rooms

La stria Madonna in na figùra dal film
Quàtar cambri
1995
Regìa: Allison AndersAlexandre Rockwell
Robert RodríguezQuentin Tarantino
Scritōr: Allison Anders • Alexandre Rockwell
Robert Rodríguez • Quentin Tarantino
Atōr: Tim RothValeria GolinoMadonna
Lili TaylorAntonio BanderasSalma Hayek
Marisa TomeiBruce WillisQuentin Tarantino
Müsica: Combustible Edison
Léngua: Ingléś
Dürä dal film: 98 minüt
Nasiōṅ: Stat Unî


«
Dód'ś òspit minga tant gustóś, quàtar dmandi scandalóśi e 'n faturèṅ da par lò, in dal sò prim dè 'd lavōr, ch'l è lè par la nòt ad cavdàn più salvàdga dla sò vita.»
(Tagline dal film)


Four Rooms (Quàtar cambri) l'è na cumèdia americàna a epiśòdi dal 1995 giràda par l'Allison Anders, Alexandre Rockwell, Robert Rodríguez e Quentin Tarantino, quàt'r amìg a i tèmp dal Sundance Institute ad Robert Redford ch'i 'l aṅ anc scrita.

Sunt

Ted (Tim Roth) 'l è 'n śuvnòt ch'al fà 'l faturèṅ in 'n albêrg ad Los Angeles. In dal sò prim dè 'd lavōr, durànt la nòt ad cavdàn, al gh'à la manéra ad cgnósar la gint ad quàtar cambri in du lò al gh'à da sarvìr.

Suite luna 'd mēl - epiśòdi „Śbóbia strâna“ (scrit e dirèt par l'Allison Anders)

La Jezebel (Sammi Davis), l’Athena (Valeria Golino), la lèśbica Elspeth (Madonna), l’Eva (Ione Skye) e la Raven (Lili Taylor) i èṅ dal strìi ch'i gh'aṅ da far 'n incantéśum par far turnàr in vita la sò dèa Diana (Amanda De Cadenet). Cun sèg la śōvna Kiva (Alicia Witt), al sinc dóni i gh'aṅ da misćiàr soquànt ingrediènt in dla vasca da bagn dla suite „luna 'd mēl“, cambra in du dimóndi an prima la dèa l'éra stada vitma dna striarìa cóntar. L’Athena la pòrta dal lat matéran, l’Elspeth la gh buta dèntar dal sangṿ dna vìrgin biónda, la Jezebel la gh śgósla dal sudōr dal còsi ad sinc óm e la Raven la vèrsa un butiglièṅ cun dèntar dal sò làgarmi. Quànd 'l è 'l tùran dl’Eva, ch'la gh'iva da śuntàr-ag dla śbòra dal sò Bill, la śōvna la diś che quànd 'l è stâ óra ad catàr-la sù par métar-la via l'à pardû al cuntròl e la l'à mandàda śò. Chi atri strìi i s rabìsan sèg parchè la gh'iva da druàr al maṅ, par furtùna che da cal bandi lè a gh'è incóra Ted e l’Eva la pōl acsè far sù 'l ingrediènt ch'a gh calàva.

Cambra 404 - epiśòdi „'L óm śbaliâ“ (scrit e dirèt par Alexandre Rockwell)

Di cliènt dna fèsta i órd'n a Ted dal giàs ma i gh dàn'n al nùm'r ad cambra śbaliâ dònca 'l faturèṅ al finìs in qvéla dna còpia 'd spóś, l’Angela (Jennifer Beals) e sò marè Sigrfido (David Proval). La dóna l'è ligàda su na scrana c'n un fasulét in bóca méntar lò al gira narvóś par la cambra cun na pistòla in maṅ. Quànd Ted al vèra 'l us, Sigrfido al créd che lò al sia 'l sò amànt e, gelóś mat, al gh dà adòs. Ma 'l è tuta na burla e 'n śōg eròtic.

Cambra 309 - epiśòdi „I maleducâ“ (scrit e dirèt par Robert Rodriguez)

La còpia 'd spóś dla cambra 309, un ric mesicàṅ (Antonio Banderas) e sò mujér (Tamlyn Tomita), i decìd'n ad pasàr la nòt d'l ùltim dè d'l an a na fèsta in du a gh'è da balàr. Par tgnir adrē a i sò dū baghét, la Sarah (Lana McKissack) e Juancho (Danny Verduzco), i ślùngan sinc-sènt dòlar a Ted par dar-ag 'n òć ógni mèśóra e mét'r-i a lèt prima 'd mèśanòt. P'r al fat ch'a s sènt vgnir fóra na pusa ad c'l àtar mónd da sóta 'l lèt, la Sarah la spòsta 'l stramàs e la cata 'l cadàvar dna rója mòrta masàda (Patricia Vonne). La ragasōla la ciàma subìt a 'l telèfun Ted che quànd al véd al còrp al gh gòmita insìma. In cal mént'r al mesicàṅ, turnâ in albêrg cun sò mujér in bras ch'l'à ciapâ la ciùca, al vèra 'l us e 'l véd sò fiōla cun na butìglia vōda 'd spumànt in maṅ, Juancho ch'al fuma, na dunàsa cavàda śò (Salma Hayek) ch'la fà di balét spurcaciòṅ a la televiśiòṅ, al cadàvar dla putàna par tèra e la cambra ch'la ciàpa fōg par via dna cica finìda su 'l spìrit dla butìglia. Cuma s'a n gh fus gnanc indivìś, 'l óm al bacàja «Aṅ-i fat i maleducâ?».

Àtic - epiśòdi „'L óm 'd Hollywood“ (scrit e dirèt par Quentin Tarantino)

Ted al n in pōl piò e 'l vrév licensiàr-as ma prima al gh'à da purtàr dla ròba urdnàda da tri amìg 'd Hollywood pîṅ ad bèsi e dal tut imbariàg: Chester Rush (Quentin Tarantino), Leo (Bruce Willis) e Norman (Paul Calderón). Rivâ in d'l àtic cun na pasta, un manarèṅ, un séć ad giàs, na śgavéda cun dla lasa anvlupàda, tri ciòld, na piastarōla 'd légn e 'n sandwich, Ted al gh cata anc l’Angela, qvéla dla cambra 404. La dóna la gh tōś al sandwich mént'r al cinèfil Chester al s magna la pasta e pò al gh cònta ch'l à fat na scumésa cun Norman cumpàgna a qvéla che Steve McQueen 'l iva fat cun Peter Lorre in un telefìlm 'd Alfred Hitchcock di an Ssanta, „'L óm dal sud“. Se Norman 'l è bòṅ 'd impisàr par déś vòlti 'd fila la sò machinéta p'r al fōg sénsa śbaliàr gnanc un cōlp lò 'l è prònt a rigalàr-'g al ciàṿ dal sò machinòṅ rós ma s'al pèrd al gh'à da lasàr-as tajàr via 'n . A dar al cōlp ad gràsia c'n al manarèṅ al gh'à da èsar Ted e Chester, par cunvìs'r-al, al gh śibìs mila dòlar p'r un secónd ad lavōr. S'l'andìs acsè al dî al sarév tgnû sóta giàs par far in manéra ch'a 'l uśdàł i cirùśig i pòsan tacàr-'g-'l incóra. S'i èṅ stâ bòṅ ad far-al c'n al cas ad John Bobbitt tajâ via c'n un curtèl da sò mujér, 'l è fàcil ch'i al pòsan far anc c'n al mìgnul dla maṅ. Norman al partìs acsè c'n al prim cōlp che però al n impìsa minga la vampa, Ted al gh dà 'n cōlp séc e al s pòrta via i bèsi.

Culegamènt estéran