Cruel Intentions - Prima regola non innamorarsi
|
C'l artìcul chè 'l è scrit in
Miranduléś |
 Cruel Intentions
| ||
| Cruel Intentions - Prima regola non innamorarsi | ||
 La Gellar e Ryan Phillippe in na figùra dal film | ||
| Bruti intensiòṅ - Prima règla minga inamuràr-as 1999 | ||
|---|---|---|
| Regìa: Roger Kumble | ||
| Scritōr: Choderlos de Laclos • Roger Kumble | ||
| Atōr: Ryan Phillippe • Sarah Michelle Gellar Selma Blair • Reese Witherspoon • Tara Reid Joshua Jackson • Sean Patrick Thomas Louise Fletcher • Eric Mabius • Swoosie Kurtz | ||
| Müsica: Ed Shearmur | ||
| Léngua: Ingléś • Francéś • Vietnamîd | ||
| Dürä dal film: 97 minüt | ||
| Nasiōṅ: Stat Unî | ||
Cruel Intentions - Prima regola non innamorarsi (Bruti intensiòṅ - Prima règla minga inamuràr-as) 'l è 'n film dramàtic e eròtic dal 1999 ad Roger Kumble ch'al 'l à anc scrit adatànt in na ciàṿ mudérna al rumànś Al relasiòṅ periculóśi ad Choderlos de Laclos. Al regìsta 'l à pò anc girâ un prequel in dal 2000 da 'l tìtul Cruel Intentions 2 - Non illudersi mai mént'r in dal 2004 'l è vgnû fóra un sequel dirèt par Scott Ziehl, Cruel Intentions 3 - Il fascino della terza volta.
La pelìcula l'à fat sù dagnóra stanta-siē migliòṅ ad dòlar, dimóndi da piò di cóst fér'm a déś e mèś. In dla culòna sunóra i s càtan di pès di Placebo, Fatboy Slim, Blur, Skunk Anansie e àt'r incóra.
Sunt
Sebastian Valmont (Ryan Phillippe) 'l è 'n śuvnòt femnàr pîṅ ad bèsi ch'al s è stufâ ad purtàr-'s a lèt sèmpar cal dóni ad Manhattan ch'at cat dapartùt, adès al punta in élt. La sò surelàstra la s ciàma Kathryn Merteuil (Sarah Michelle Gellar) e la stùddia dimóndi, la diś al préghi e la pâr na ragàsa mudèl ma invéci l'è tut àtar, ad dèntar l'è malnéta e catìva. Un dè chi lē la gh śibìs un śuglèṅ: vlénd-as vindicàr dal sò ex muróś, Court Reynolds (Charlie O'Connell), ch'al l'à mulàda par mét'r-as cun la Cecile Caldwell (Selma Blair), la trapèla ad far-la dvintàr a gl'òć ad tut la "rója nùm'r òṅ ad New York" parchè a Court ad lē a gh piàś al fat ch'l è na ragasōla a mōd. Par far-al la gh'à biśógn che lò al faga in manéra ad purtàr-la sèg in dal mónd spurcaciòṅ dal visi. Sebastian però al n è minga interesâ parchè par lò 'l è 'n quèl tròp fàcil, piutòst al vrév gusàr-as la fiōla dal prèsid dla scōla, l’Annette Hargrove (Reese Witherspoon), una ch'l'à dit in n'intervìsta ch'la vōl rivàr vìrgin a 'l matrimòni. S'a gh la cav'rà, in cambi al vōl far-as l'ùnica dóna ch'al n pōl minga ciulàr-as, la Kathryn. Se invéci a gh'and'rà mâł, sò surèla la gh purà purtàr via la sò Jaguar dal Sinquànta-siē.
Sebastian al taca acsè a lauràr-as l’Annette ma la ragàsa la ricév na létra in dua a s diś ad star aténti a lò ch'l è sōl un ciavadōr spurcaciòṅ e gnint àtar. Al ragàs al gh và a fónd e al vèṅ a savēr ch'a mandàr-la l'è stada la sgnōra Bunny Caldwell (Christine Baranski), la màdar dla Cecile.