Apri il menu principale

C'l artìcul chè 'l è scrit in Miranduléś Emiliàn

Video-x-generic.svg Contagion
Contagion
Contagion.png
Na Paltrow minga tant in bóla in na figùra dal film
Cuntâǵ
2011
Regia: Steven Soderbergh
Scritùr: Scott Z. Burns
Atùr: Matt DamonJude LawKate Winslet
Marion CotillardGwyneth PaltrowElliott Gould
Laurence FishburneJennifer EhleJosie Ho
Müsica: Cliff Martinez
Lengua: IngléśCinéś
Dürä dal film: 106 minüt
Nasiòṅ: Stat UnîEmirâ Àrab Unî


«
Ninsòṅ 'l è imuniśâ da la paùra.»
(Tagline dal film)


Contagion (Cuntâǵ) 'l è 'n film thriller dal gènar catastòfic dal 2001 ad Steven Soderbergh.

La pelìcula, preśentàda a 'l 68śum Fèstival ad Venèsia, l'à fat sù da piò ad sènt-trentasìnc migliòṅ ad dòlar dòp ès'r-an custàda ssanta.

Sunt

Dòp èsar turnàda a cà a Minneapolis da 'n viàś 'd afâr a Hong Kong, la Beth Emhoff (Gwyneth Paltrow), ch'la gh'à 'n amànt a Chicago, la casca śò par tèra a pēś mòrt tacànd anc a śbavśàr. A n s trata minga ad fardōr ma 'd un quèl ch'a pâr 'n infesiòṅ a 'l sarvèl. Sò marè Mitch (Matt Damon) al la pòrta subìt a 'l uśdàł ma a n gh'è gnint da far: la dóna la mōr in pôc tèmp, acsè cuma sò fiōl pìcul armàś a , Clark (Griffin Kane), cuntagiâ anc lò. Invéci cl'atra fiōla, la Jory (Anna Jacoby-Heron), la s è salvàda parchè l'éra via.

A s trata 'd un brut mâł ad qvéi nóṿ, un vìrus misć ciamâ MEV-1 ch'al culpìs i palmòṅ e 'l sistéma narvóś nâ da 'n incróś fra qvéi dal nimàl e dal papastrèl. In di Stat Unî i gh próan a 'ndàr-'g a fónd i dutōr Ellis Cheever (Laurence Fishburne), Ian Sussman (Elliott Gould), l’Ellis Cheever (Laurence Fishburne) e l’Erin Mears (Kate Winslet) méntar 'l Urganiśasiòṅ Mundiàla par la Salùt la manda la Leonora Orantes (Marion Cotillard) in Cina par pascàr al pasiènt śèr.

Al giurnalìsta Alan Krumwiede (Jude Law), ch'al gh'à 'n blog in internet, al tîṅ adrē a 'l caś ma pò a s mala anc lò acsè cuma l’Erin ch'la n gh la cava piò a mandàr śò, la gh'à sèmpar mâł a la tèsta e fēvra a trénta-nóṿ. La dutōra la mōr mént'r in televiśiòṅ Alan al dà adòs a 'l dutōr Cheever e a i respunsàbii dla salùt americàṅ, qvéi dla CDC, dgénd ch'al n la cònta minga giùsta e ch'al cumpagnìi dal madśìni i vōlan sōl imprufitàr-'s-an par muciàr sù di bèsi parchè 'n quàlc fàrmag ùtil par cumbàt'r al mâł a gh sarév bèla. In pòchi paròli i èṅ tut 'd acòrd, l'è tuta na cumèdia.

La gint la taca a vudàr i supermarcâ, c'n al bòni e c'n al catìvi, mént'r al Wiscònsin al fà in manéra ad srar i cunfîṅ. Quànd a vèṅ bòṅ un prim vasìn da inśdìr, p'r al fat ch'a n gh 'n è mia abàsta par tut, a s fà na lutarìa par decìd'r a chi dar-al. La pulisìa la mét in parśòṅ Alan parchè 'l iva sōl fat finta 'd èsar-'s malâ e pò guarî tulénd dla Forsythia faghénd acsè in manéra ad far sù di migliòṅ di dòlar ma i sò sustenidōr i gh pàgan la causiòṅ. La Leonora la vèṅ sequestràda da i cinéś p'r avér in cambi di vasìn ma chi lōr i vènan fargâ parchè in cambi i gh dànan sōl di fàrmag placebo. Invéci Cheever al dà qvél bòṅ a sò mujér Aubrey (Sanaa Lathan) saltànd la fila, dòp avér-ag dit prima ad tut chi àtar ad scapàr via da Chicago in udōr ad quaranténa.

Culegamènt estéran