Chebèch
| St’artéchel ché ’l é stê scret int la koinè Emijana. | 
|
Al Chebèch (in fransaix Québec, /keˈbɛk/) ’l é na pruveinsia dal Canadà, la pió granda pr estensioun e la secounda pió populê dla Federasioun doap edl Untêri. Coun la sau laingua, la sau cultura es el sau institusioun, al é de facto na nasioun draint al Canadà.
Al fa pêrt dla regioun ciamê dal Canadà fransaix, par la pió ’d laingua fransaixa. La varietê dal fransaix ch'al veign bacajê par ’d sti band ché ’l é al fransaix dal Chebèch. Al Chebèch ’l é la soula pruveinsia canadaixa int la quêl al inglaix ’l é brixa laingua ufisiêl, e ona del dou int el quêl al fransaix ’l é ufisiêl (l’êtra l’é al Nauf Brûnsvich, in fransaix Nouveau-Brunswick). Quej ch'i dscoarn inglaix int al Chebèch en na minuransa argnusû de la lèz.
I su 8 326 089 carstian, ciamê chebecheix, en al 24% dla populasioun tutêla dal Canadà. Al Chebèch as cata del band canadaixi ’d mateina, anca se Teranauva e Lâbrador es el tse det "pruveins maretmi" (Nauf Brûnsvich, Nauva Scôsia, Ixla dal Prainsip Duvêrd) ej s câten incoar pió a mateina.
La capitêl dla pruveinsia l’é la sitê ’d Chebèch (ville de Québec in fransaix, Quebec City in inglaix), mo la sitê pió granda l’é Mountriêl (Montréal in fransaix, Montreal in inglaix).