Campovōlo ed Rèz
| C'l artìcul chè 'l è scrit in Arzân | 
|
Artécol in dialèt arzân
Al Campovōlo ed Rèz (Aeroporto di Reggio ciamê Aeroporto Città del Tricolore in italiân) l'é, dal 1997, un campovōlo avêrt al trâfich internasionêl, dôp èser stê la pésta ed prōva di mudê dal j Uficîni Regiâni fîn a la Secònda guèra mundiêla e 'na pésta per pasatèimp dôp la guèra.
Stôria
La zôna dal Campovōlo ed Rèz la vîn druvêda dal 1916, ân in dó lé a 'gh vîn fât 'na pésta per i cavâj, in dóv' i trât 'd êrba a vînen druvê ânca pr' i prém aparèc ed la Caproni. Cun un decrêt dal 12 novèmber dal 1930 a vîn decîş ed fêr un campovōlo ed furtûna per aparèc, ch' al vîn pó druvê sōl dôp al 1935, quând al cumîncia a 'd èser druvê cme pésta ed prōva pr' al Ufucîni Regiâni, lé atâch, ch' al drōven dimòndi pr' al prōvi di tânt mudê ch' àn fât, a cumincêr dal 1937, int al cōrsa al j êrmi fâta préma ed la Secònda guèra mundiêla.
La Secònda guèra mundiêla
Al tèimp ed la guèra al Campovōlo al vîn durvê in tânti manēri: in pió che pésta ed prōvi al vîn druvê ânca cme la scōla di pilôta 'd aparèc. Dal setèmber 1942 al cumîncia a 'd èser druvê per i cumbatimèint, ânca se mìa ed cunténov, préma cun i bumbardēr Cant Z 1007-Bis, pó cun j aparèc da câsa. In particulêr dôp la pêş a và stêregh al 1° gróp Câsa ed l' Aeronautica Nazionale Repubblicana cmandê dal magiōr Adriano Visconti. Al Campovōlo al vîn més fōr 'd ûş da l'eşêrcit tedèsch int al setèmber dal 1944, per paûra ch' a gnés sfundê la Lènia Gôtica da j Aleê.
Stôria ed pôch tèimp fa
Dôp la guèra al Campovōlo al vîn arfât e druvê sōl pr' al j ativitê ed pasatèimp. Incō l'é un campovōlo avêrt al trâfich comercêl, sibèin al gh' âbia mìa dal trâti impurtânti. A câşva ed còst, al 's câta ògni tânt dèinter a dal quistiòun: ânca s' l' é dèinter a un teritôri réch ed pusibilitê e ûş stôrich, al Campovōlo an gh' l' à mai cavêda ad avèinr un pèiş impurtânt ind la rêda di servési póblich. Int al mâg dal 2007 al Comûn ed Rèz l'à préma decîş ed mèter in liquidasiòun la socetê che i gèstés. Dôp a s'é fât strêda l'idèja ed vèndrél a di privê. Int al zógn dal 2008 la socetê ch' la gestés al Campovōlo l'à fât un avîş per la siēlta 'd un sôci privê, ch' al cumpraré al pêrti ed la socetê in mân a j èint póblich.
I cuncêrt
Al mutîv dal perché al Campovōlo l'é cgnusû l'é per avèir avêrt al pôrti a di cuncêrt dimòndi grôs:
- 12 setèmber 1992: Monsters of Rock (nasû cme un festivâl inglèiş ed mûşica heavy metal che dôp al s'é spustê ânca a l'èster).
- 20 setèmber 1992: U2 – PopMart Tour (al cuncêrt l'é stê un fât mundiêl cun 146.000 spetadōr ch' àn paghê, prém pôst ed tót i tèimp per un gróp muşichêl).
- 10 setèmber 2005: Luciano Ligabue (pió êlt nómer ed gînta per un cuncêrt a pagamèint 'd un sōl cantânt in Europa[1], da dóve è stê fât un désch in DVD cun al tétol Campovolo)
- 16 Lój 2011: Luciano Ligabue - Campovolo 2.0
Materiêl pr'andêregh in fònda
Êter prugèt
Wikimedia Commons contiene file multimediali su Campovōlo ed Rèz
