C'l artìcul chè 'l è scrit in Spilambertés Emiliàn

Al quèder


L’ Asùnta éd Guido Reni (Assunta di Guido Reni in itagliàṅ) l'è un quèder dal pitór bulgnes Guido Reni (1575-1642), che al dè d’incó as pól vàdder ind la Alte Pinakothek ed Monaco di Baviera

La só stòria

A partir dal méll e quaterzeint a Spilambert a gh’è stè la Confraternita ed Santa Maria di Anzél, un grópp ed sozi chi feven dla caritè e specialmeint i tgniven adré a un uspdel pr’i puvràtt. Atach a l’uspdel i gh’iven na capèla fin quand, ind al 1637, i tirénn só ‘na cesa (ed Santa Maria degli Angioli), ch’l’è quàlla che as pol vàdder incàrra adesa. Par l’alter magior dla cesa is fénn fer un queder ed Santa Maria Asunta dal pitór bulgnes Guido Reni (1575-1642), che a finirla agh mité un poch ed tèimp, mo a la lónga agh la cavé e al la cunsgné ind al 1642, poch prémma ed murir.

Al problema l’è che stra la Cesa e al queder, la Confraternita l’iva spes dimondi e agh tuché ed tachèr a fer di debit, sovratótt coun di prét (i Padri Teatini) con la mediazioun dal sgnuraz dal paes, al Marches Rangoun: e l’andé a finir che i vanzénn in bulàtta e ind al 1661 i tgnénn vander l’Asunta. Dedchè in avanti la storia l’an es sa brisa, mo a la longa al queder l’andé a finir in Germania e adesa l’è ind la Alte Pinakothek ed Monaco di Baviera.

Par savéren de pió

  • Maria Paola Lelli, Un capolavoro perduto, Istituto Enciclopedico Settecani, Spilamberto (Modena), 2016