Anna Identici
|
C'l artìcul chè 'l è scrit in
Miranduléś |
L’Anna Identici (Castigliòṅ, 30 ad Luj dal 1947) l'è na cantànta itagliàna.
Biugrafìa
Fiōla 'd un feruvér, la Identici fiṅ da pìcula la s divertìs a cantàr in soquànt spetàcui pruvinciài fra la Lumbardìa e l'Emìglia. Dòp la sò partecipasiòṅ a 'l Fèstival al Castrucâr dal 1964, al preśentadōr Mike Bongiorno al la sarnìs par far la valéta in dal sò prugràma La fiera dei sogni.
'L an dòp la vins al Fèstival ad Śurîg c'n al braṅ Un bene grande così, pò la tōś part a 'l Fèstival ad Sanremo c'n un pès scrit par lē da Bruno Lauzi, Una rosa da Vienna.
Sèmp'r in dla sità di fiōr la Identici la preśénta in dal 1968 qvéla ch'la dvintarà la sò canta più famóśa, Quando m'innamoro. Anc Bob Dylan e i Grateful Dead i faràṅ na versiòṅ da 'l viṿ ad cal pès chè durànt i sò cuncèrt insém dal 1989.
In dal 1969 la próa a masàr-as ma al la scampa, in tut al manéri la càmbia al sò stîl, pasànd da èsar na ragàsa àqua e savòṅ a far la cantànta imgnàda, laurànd anc c'n Umberto Bindi.