Alfonso Signorini
|
C'l artìcul chè 'l è scrit in
Miranduléś |
.jpg)
Alfonso Signorini 'l è un giurnalìsta, scritór e cundutór televiśìṿ.
Biugrafìa
Alfonso Signorini al nas a Milàn al 7 'd Avrìl dal 1964. Dòp èsar-'s laureâ in Filulugìa Mediuevàla a l'Università Catòlica, al tóś anc un diplòma in pianufòrt. Par sinc an 'l inséggna létri al scóli mèdi.
Carta stampàda
Dòp avér lasâ cal mistér lè, al taca a lauràr cun al giurnàl La Provincia di Como e pò cun al setimanàl Panorama in du 'l è 'n espèrt ad petegulés. Al pasa pò a Chi, sèmpar par la Mondadori e al dvènta al diretór dla rivìsta in dal 2006. Al 23 ad Śugn dal 2008 al tóś la diresiòṅ anc ad TV Sorrisi e Canzoni.
Televiśiòṅ
Al sò primi aparisiòṅ i èṅ dal 2002, quànd al fà di cumènt par la traśmisiòṅ ad Rai 2 Chiambretti c'è cundóta par Piero Chiambretti.
In di an sucesìṿ al fà 'l òspit in dimóndi prugràma anc in dl'Isola dei Famosi ad Simona Ventura.
In dla stagiòṅ 2005/2006 al cundùś Verissimo insém a Paola Perego e pò, in di an sucesìṿ, cun Silvia Toffanin, na ex letterina che in cal mèntar la s éra misa insém al fiól ad Silvio Berlusconi, Pier Silvio. Alfonso al lavóra anc par di àtar prugràma Mediaset: Scherzi a parte e Grande Fratello.
In dal 2010 al taca la cundusiòṅ dla sò prima traśmisiòṅ da par lò Kalispéra! cun Elena Santarelli e Ana Laura Ribas in du al fà da gl'intervìsti. In dal córs dal prugràma al dà adòs a Massimo D'Alema, insém al sò editór Berlusconi ch'l éra al telèfun, faghénd védar na foto ad "baffino" in du al sa vdiva a Sankt Moritz cun na siàrpa ad cachemir (ma D'Alema 'l à pò dit che la n éra minga ad cal tesû lè).
In dla puntàda dal 19 ad Śnar al fà dal dmandi cun al cór in maṅ a Ruby Rubacuori ch'la gh diś ch'l'à sabû sól in si giurnài ch'i ìvan dit che lē l'éra l'avóda dal presidènt egisiàṅ Hosni Mubarak. Mediaset al dmanda pò a Youtube ad scanślàr al viddeo d'l intervìsta dal sò sit che invéci al al s pól catàr incóra in quél ad L'Espresso.[2][3]
In dl'ultma puntàda ad Kalispéra al s fà intervistàr par Maria De Filippi. Signorini al gh diś ch'l'è stada dimóndi dura èsar un fnòć e un cristiàṅ, tut i du insém, ma minga par cólpa dla Cēśa, ch'la n gh'à gnint còntra i fnòć, ma parchè a n s pól minga far dal sès cun di ubietìṿ difarènt ad quéi dla riprudusiòṅ e quést chè al gh à purtâ di patimènt anc s'al sà che Dio al al pardóna sèmpar listés.[4]
Prugràma
- Chiambretti c'è (2002)
- Markette (2004/2008)
- Ritorno al presente (2005)
- Verissimo (dal 2006)
- Scherzi a parte (2007)
- Grande fratello (dal 2008)
- Maurizio Costanzo Show (2009)
- Kalispéra! (dal 2010)
Òpri
- Costantino desnudo 2004
- Il Signorini. Chi c'è c'è, chi non c'è s'incazza 2006
- Troppo fiera, troppo fragile. Il romanzo della Callas 2007
- Chanel. Una vita da favola 2009
- Blu come il sangue. Storie di delitti nell'alta società 2010
- Marylin. Vivere e morire d'amore 2010
- L'altra parte di me 2015
- Ciò che non muore mai. Il romanzo di Chopin 2017
Nòti
- ↑ Si chiama Putin il mio sogno erotico lastampa.it, 20 'd Agóst dal 2010
- ↑ Tu quoque, Alfonsina! dagospia.com, 17 ad Favràr dal 2011
- ↑ Caro Dago dagospia.com, 18 ad Favràr dal 2011
- ↑ Signorini si confessa con la De Filippi adnkronos.com, 26 ad Śnar dal 2011