C'l artìcul chè 'l è scrit in Miranduléś Emiliàn

Ace Frehley tòlt śò in dal 1999 durànt un tour di Kiss


Paul Daniel Frehley dit Ace (New York, 27 'd Avrìl dal 1951) 'l è 'n cantànt e chitarìsta hard rock americàṅ, cgnusû principalmènt p'r èsar stâ òṅ di mémbar fundadōr di Kiss. Al sò scutmàj 'l è The Spaceman (’L óm dal spasi) par via dal custùm e dla mascra ch'al s éra sarnî p'r al sò persunàǵ.

Biugrafìa

Ace durànt un cuncèrt da par lò
La sò mascra cun i Kiss

da śóvan

Nâ in dal Bronx da na famìja ad muśicìsta sénsa tant bèsi, Ace al taca a tgnir a drē a soquànti gangs ad strada insém a Blackie Lawless, in séguit leader di W.A.S.P.. Par tiràr-al via da 'd là, i sò genitōr i gh còmpran a tréd'ś an na chitàra ma lò al cuntìnua, incóra p'r un pôc, a far la sò vita da 'rvèrs, in fin tant che durànt na casutarìa i gh śbràgan 'l crani cun na butìglia ad vēdar in tèsta.

A vint an Ace al s mét 'd inśégn par sunàr dabòṅ al sò strumènt, scultànd di chitarìsta cuma Eric Clapton, Pete Townshend, Jeff Beck e Keith Richards di Rolling Stones. Tòlt al diplòma, Frehley al taca a far di lavursèṅ par far sù di bèsi e cumpràr-as di strumènt fat méj, tacànd a sunàr in cal méntar in grup cuma Magic People, The Muff Divers e Four Roses, muciànd sù dl'esperìnsa.

cun i Kiss

Vèrs la fiṅ d'l an dal 1972 Frehley al lèś 'n anùnsi in sun giurnàl 'd un grup ch'al pascàva un chitarìsta sulìsta e al s śibìs par la part faghénd un pruvèṅ par lōr. Paul Stanley 'l al tōś minga sōl par la sò bravitù ma anc p'r al fat ch'al fus mèś mat (a s diś ch'al s éra preśentâ cun di calsét adòs ad culōr difarènt).

I nàsan acsè i Kiss, òṅ di grup più impurtànt dla stòria d'l hard rock mundiàl. La furmasiòṅ dal grup la vdida Paul Stanley a la vóś e a la chitàra, Gene Simmons a la vóś e a 'l bas, Peter Criss a la baterìa e lò a la chitàra sulìsta. In dal 1974 i faṅ gnir fóra i disc Kiss e Hotter than hell. Al gènar sunâ 'l éra quél dal glam rock, ch'al dava dimóndi impurtànsa a 'l spetàcul e a la manéra ad far-as védar, cuma i fàvan anc di grup cuma New York Dolls, Alice Cooper e Slade.

In sal cupertìni di disc e durànt i cuncèrt i quàtar cumpunènt di Kiss i figuràvan sèmpar cun di custùm particulàr e cun dal mascri ad truc adòs. Ace al s éra sarnî par lò al persunàǵ ad Spaceman. Al druàva anc di efèt sènic ligâ a la sò chitàra Gibson Les Paul durànt i cuncèrt par far dal silti o tiràr di raś.

Al grup al s fà cgnósar specialmènt p'r al disc dal viṿ Alive! e p'r i àlbum Dressed to Kill (1975) e Destroyer (1976). Cun al lavōr dal 1977 Lovegun, Ace al taca anc a cantàr di pès (Shock me), rivànd anc a dar la sò vóś a tri braṅ in dal disc Dynasty dal 1979 (cun al sìngul 2000 man, cover di Rolling Stones). 'L an prima i quàtar mémbar dal grup i ìvan fat gnir fóra quàtar disc par sò cònt, ma sèmpar ligâ a 'l nóm Kiss, e quél 'd Ace 'l éra stâ al più vindû, cun al sìngul ad sucès New York groove.

Dòp avér sunâ in dal concept album Music from the Elder dal 1981, Frehley al decìd ad mulàr i Kiss in dal 1982 parchè Paul e Gene i vlìvan far sèmpar quél ch'a gh parìva lōr e parchè al n éra briśa 'd acòrd cun 'l andàs muśicàl ch'al grup 'l iva tòlt cun i ùltim disc, dimóndi più alśēr e cumerciài. Inóltar, prima dal prevìst e mai fat tour ad "The Elder", Ace al fà 'n incidènt spavintóś cun la sò DeLorean.

Par véndar da piò, al grup però al fà finta listés che lò al gh sia incóra e in dal cupertìni di disc dal 1982 Killers e Creatures of the Night Ace al gh cumparìs insìma anc s'al n iva gnanc sunâ na nòta. A sunàr lè i éran stâ invéci di turnìsta cuma Bob Kulick, Adam Mitchell, Steve Farris e Vinnie Vincent: qvést chè al turà pò al sò pòst in di Kiss a partìr da 'l Dicémbar dal 1982.

In dal 1998 Frehley al tórna par soquànt an incóra in dal grup par far gnir fóra al disc Psycho Circus e par di tour mundiài ma pò al sò pòst al vèṅ tòlt par Tommy Thayer in dal 2002.

Prugèt da par lò

Ace Frehley sénsa mascra
Ace a i tèmp di Kiss

Dòp avér lasâ i Kiss, Ace al mét in pē na banda par sò cònt, i Frehley's Comet, e sèg al fà gnir fóra un disc cun al stés tìtul in dal 1987. In d'l àlbum i sònan Anton Fig a la baterìa ('l iva sunâ anc in di disc dal "Baś" Dynasty e Unmasked a 'l pòst ad Peter Criss), al chitarìsta e cantànt Tod Howarth e al basìsta John Regan. 'L an dòp 'l è al tùran 'd un mini-àlbum intitulâ Live + 1 e dal secónd lavōr in studi, Second Sighting cun Jamie Oldaker a la baterìa.

Da 'l 1989 in avànti i disc 'd Ace i pòrt'n al sò nóm, a partìr da Trouble Walkin dal 1989 in dua Frehley al canta lò in tut i braṅ, cun di òspit famóś cuma Sebastian Bach e Dave Sabo di Skid Row e Peter Criss. 'L ùltim sò lavōr 'l è Anomaly dal 2009.

Discugrafìa

da par lò

  • 1978 - Ace Frehley
  • 1989 - Trouble Walkin'
  • 1997 - 12 Picks
  • 1998 - Loaded Deck
  • 2006 - Greatest Hits Live
  • 2009 - Anomaly

cun i Kiss

  • 1974 - Kiss
  • 1974 - Hotter Than Hell
  • 1975 - Dressed to Kill
  • 1975 - Alive!
  • 1976 - Destroyer
  • 1976 - Rock and Roll Over
  • 1977 - Love Gun
  • 1977 - Alive II
  • 1978 - Ace Frehley
  • 1979 - Dynasty
  • 1980 - Unmasked
  • 1981 - Music From "The Elder"
  • 1996 - KISS Unplugged
  • 1998 - Psycho Circus

cun i Frehley's Comet

  • 1987 - Frehley's Comet
  • 1988 - Live+1
  • 1988 - Second Sighting

Culegamènt estéran